Иннокентий Григорьев салайыытынан спортсменнар от ыйын 13 күнүгэр Калифорния Сан-Хосе куоратыгар Fit-Expo-2104 күрэхтэһиигэ кытыннылар. Манна мас-рестлиҥҥэ чемпион Александр Аринкин  уонна мас-рестлиҥи сайыннарыы отделын начальнига Иван Белолюбскай сырыттылар.

«Америкаҕа мас-рестлинг тургун билсэн бараммын, cпорт бу көрүҥүн сайдыытыгар кинилэр инникитин баһылыыр-көһүлүүр оруолу ылыахтарын сөп эбит диэн үөрдүм. Америкаҕа мас-рестлинг федерациятын президенэ Одго Хаунген салайыытынан сөптөөхтүк дьарыктаналлар эбит уонна  спорт бу көрүҥэ сокуонунан тирэхтээҕин биһирээтим», - диэтэ Иннокентий Григорьев от ыйын 16 күнүгэр буолбут пресс-конференцияҕа.

Мас-рестлинг сылын аайы ыытыллар фестивальга спорт саҥа көрүҥүн быһыытынан киирбит. Манна бу көрүҥҥэ 138 киһи күүһүн холонон көрбүт. Оттон чемпионакка - 23 киһи. Кинилэр ортолоругар Саха сирин спортсмена Александр Аринкин 90 кг диэри ыйааһыҥҥа күөн көрсүбүт.

 Чемпионакка спортсменнар алта ыйааһыҥҥа күрэхтэспиттэр. Бу түмүгүнэн Дьокуускайга сэтинньигэ ыытыллар аан дойду чемпионатыгар кыттар АХШ сүүмэрдммит хамаандатын састаабын быһаарбыттар.

«Америка спортсменнара мас-рестлинг быраабылатын тилэри баһылаабыттар. Кинилэр ортолоругар инники күөҥҥэ сылдьааччылар бааллар», - диэтэ Иван Белолюбскай.