Урукку баһылык  Семен Федулов олохтон туораабытынан Өлүөхүмэҕэ болдьоҕу иннинэ быыбар ыытыллар. Билигин кини оннугар баһылык эбээһинэһин  Виктор Васильев толорор. Кинини «Биир ньыгыл Россия» паартия өйөөбүтэ. Онон, В.Васильев бэйэтин кандидатуратын балаҕан ыйыгар ыытыллар быыбарга бигэтик киллэрдэ. Токко сэлиэнньэтин учуутала  Сергей Алексеев кини утарсааччыта буолуоҕа. Кинини коммпаартия туруорда. Кэлиҥҥи быыбарга бу паартия Алексеевы өйөөбүтэ эрээри, кини өлүөхүмэлэр быыбардааччыларын куолаһын 14 бырыһыанын ылан Семен Федуловка хотторбута. РЛДП пуорт хонтуруолун инспекциятын начальнигын Иван Игнашевы өйүүр. «Атлант» МУП дириэктэрэ  Иван Куприянов, Солянка нэһилиэгин баһылыга  Альбина Масина  уонна «ГазМонтаж-Сервис» ХЭТ дириэктэрэ  Максим Сафонов бэйэлэрин кандидатураларын киллэрдилэр. Кэлиҥҥи икки кандидат бэйэлэрин туруоруммут эбит буоллахтарына, Куприяновы «Өлүөхүмэ инникитэ» уопсастыбаннай хамсааһын өйүүр.

Виктор Васильев

Аллайыахаҕа икки кандидат турда. Пенсионер Борис Белюнас  уонна олохтоох дьаһалта тыа хаһаайыстыбатын управлениетын салайааччыта Роман Калининскай. Кинилэргэ сүрүн утарсааччынан культура управлениетын начальнига  Эдуард Слепцов буолар кыахтаах. Кини быыбар хамыыһыйатыгар докумуоннарын билиҥҥитэ туттара илик.

Аллараа Халыма улууһугар пенсионер Валентин Винокуров  уонна эстрада-фольклор государственнай ансамбылын артыыһа Анастасия Курилова бэйэлэрин туруоруннулар. Либерал-демократтар пенсионер Василий Третьяковы, оттон «Биир ньыгыл Россия» паартия оройуон билиҥҥи баһылыгын Иван Суздаловы киллэрдилэр.

Анатолий Кистенев

Жатай куорат уокуругар биир да кандидат докумуонун киллэрэ илик. «Биир ньыгыл Россия» эдэр депутаты Иван Луцканы өйөөтө. Кини паартия барыллаан куоластааһыныгар кыайбыта диэн эбэн этиэххэ сөп. Билиҥҥи баһылык, уокуругу 1999 сылтан ыла салайар Анатолий Кистенев кэлэр болдьоххо талыллар толору кыахтаах.