«Тыа хаһаайыстыбатын үлэһиттэригэр бобуу күрэстэһэргэ, бородууксуйа кээмэйин улаатыннарарга саҥа кыаҕы биэрэр», - диэтэ вице-премьер. 

П.Алексеев эппитинэн, сорохторго биллэн турар, бу соһуччу буолбута чахчы. Оннук, «Скиф» эти астыыр кэмбинээт өссө бобуу киириэн иннинэ тас дойдуттан сибиинньэ, ынах этин, быһа холуйан тыһыынча тоннаны атыыласпыт. Контракт түһэрсиллибит, табаар төлөммүт, эт массыыналарга тиэйиллибит. Оруобуна ол кэмҥэ бобуу күүһүгэр киирбит. Атыылаһыллыбыт эт массыыналарга суолга хаалбыт. «Предприниматель хоромньутун ким толуйар? Ити боппуруоһу РФ тыа хаһаайыстыбатын министиэристибэтин таһымыгар туруордубут», - диэтэ Алексеев.

Саха сирин баһылыгын эбээһинэһин быстах кэмҥэ толорооччу Егор Борисов быһаарыытынан асырыынагын хонтуруоллуур суһаллык дьайар штаб тэриллибитин вице-премьер санатта. Маннык хамыыһыйалар улуустарга барыларыгар тэриллибиттэр. Күн аайы ас баарын дуу, суоҕун дуу уонна сыаната үрдээбэтин хонтуруоллууллар. «Өрөспүүбүлүкэ тас өттүттэн бөдөҥ федеральнай хааччыйааччылартан аҕалыллар ас сыаната 20-30% үрдээбит», - диэтэ Алексеев. 

Быстах кэмнээх ыарахаттар кэмнэригэр үспүкүлээннээһин тахсыбатын туһугар үлэ ыытылларын П.Алексеев эттэ.

 Халбаһыыга, сибиинньэ этигэр, мокоруоҥҥа сыана эбиллибитэ биллэр.

«Эрдэ этэн аһарбыппыт курдук, олохтоох бородууксуйаны оҥорон таһаарыыга сүрүн болҕомто ууруллар. Онуоха анаммыт чопчу инвестиционнай бырайыактар сотору кэминэн олоххо киириэхтэрэ», - диэтэ кини. 

«Оччотугар олохтоох аска-үөлгэ сыана үрдүө дуо?» диэн ыйытык үөскүүр. Кэлиҥҥи уон сылга кооперациялааһын механизма көмөлөөх буолуон сөбүн П.Алексеев эттэ. «Тыа хаһаайыстыбатынан дьарыктанар 12 улуус «Сахаагропродукт» бөдөҥ кооперативка холбоммуттара. Кинилэр государство өйөбүлүнэн туһаналлар. Онон, сыананы үөскэтиини бэрэдэктиир, сүрүннүүр кыахтаахпыт», - диэтэ Петр Алексеев.