Бу айан норуокка киэҥник биллэр Найахы норуот хорун 50 сыллаах үбүлүөйүгэр ананар. Хору тэрийээччи Саха сирин культуратын үтүөлээх үлэһитэ Семен Васильев этэ. Кини олоҕун тиһэх күннэригэр диэри коллективы салайбыта. Бүгүҥҥү күҥҥэ хор сис салайааччыта суох. Ол эрээри хорунан ыллааһын дьиҥнээх сүгүрүйээччилэрэ, тыа сирин олохтоохторо: ветераннар уонна энтузиастар, коллектив сүрүн кыттааччылара.

Фестивальга кыттар программаны ыҥырыллыбыт хормейстер Наталья Бочкарева — Дүпсүн орто оскуолатын учуутала, баянист - аккомпаниатор Станислав Луковцев - Мүрүтээҕи оҕо музыкальнай оскуолатын уһуйааччыта бэлэмнээтилэр. Итини таһынан хору кытта "Кубэйэ" үҥкүү ансамбла кыттыаҕа. Үҥкүүлэри хореографтар Мария Лебедкина уонна Алена Гаврильева туруордулар.

Коллектив репертуарыгар "Найахы оһуохайа", "Кымыстаах чороону көтөҕөн" диэн норуот ырыата, оһуохай бааллар. Хор куорат араас площадкаларыгар культурнай программаҕа кыттыаҕа. 45 киһилээх делегацияны Уус-Алдан улууһун Найахы нэһилиэгин баһылыга Петр Сивцев уонна культура дьиэтин директора Дьулустаан Гаврильев салайан илдьэ сылдьыахтара.

Нэһилиэктээҕи тыыл уонна үлэ ветераннарын бэрэссэдээтэлэ, хор ырыаһыта Светлана Петрова этэринэн, кыттааччылар бары айымньылаах үлэнэн умайан, дьиэлэригэр кыайыы-хотуу кынаттанан төннөр санаалаахтар диэтэ.