Үс оҕолоох эдэр ийэ Марина Лебедева икки кырата оҕо садыгар сылдьаллар. «Куоракка олохсуйбут дьиэ кэргэн оҕону оҕо садыгар, оскуолаҕа таһыы төһөлөөх элбэх бириэмэни эрэйэрин бэркэ диэн үчүгэйдик билэллэр. Киһи барыта баҕарбытын, санаабытын хоту массынаҕа тиэйиллэ сылдьыбат, оҕону төттөрү-таары таһар эһэлээх, эбэлээх буолбатах. Үлэҕэ, оҕону үөрэххэ, араас дьарыкка таһыыга ыктарыы элбэх.

Оҕо садын урукку режимэ олус табыгаһа суох этэ. Мин үлэбиттэн 18:00 бүтэбин. Куорат биир муннугуттан атыныгар диэри автобуһунан хаһан айаннаан тиийиэхпэр диэри, суолга массыына сырыытыгар харыы муҥутуурдук үөскүүр кэмигэр, биллэн турар, олус хойутуур этим. Хойутаабат туһуттан үлэбиттэн эрдэ көҥүллэтэргэ күһэллэрим. Ити биллэн турар, үлэҕэ охсуута, содула суох ааспат этэ.

Оҕо сада билигин 19:30 диэри үлэлиир буолбутуттан олус үөрдүбүт», - диэн кини СИА-ҕа үөрэ-көтө кэпсиир. Кини этиитин кытта арааһа, оскуола иннинээи саастаах оҕолордоох, үлэлии сылдьар дьон үгүстэрэ сөпсөһөллөр.

«Оҕо садыгар сылдьыы кэмэ 12 чааска көһүүтэ күннээҕи бэрээдэкпитигэр кэккэ уларытыылары киллэрэр. Холобур, оҕо аһылыгын ахсаана эбиллэр. Онон, оҕолор 17:30 чааска эбии аһыыллар. Билигин да, инникитин да төрөппүттэргэ төлөбүр кээмэйэ үрдээбэт», - диэн оҕа садын иитээччитэ эттэ.

Онтон тэрилтэ үлэһиттэрин хамнаһын туһунан этэр буоллахха, манна эмиэ улахан уларыйыы суох. Оҕону иитээччи урукку өттүгэр соҕотоҕун оҕолору көрбүт-истибит эбит буоллаҕына, билигин кини күн аҥаара үлэлиир, онтон хаалбыт аҥаарыгар кинини атын иитээччи солбуйан биэрэр. Инньэ гынан, иитээччи үлэлиир кэмэ кылгыыр уонна хамнаһа уруккутун курдук оннунан хааларын туһунан куорат дьаһалтатын оскуола иннинээҕи отделын специалистара эттилэр.