2014 сыл бастыҥ спортсменын үрдүк аата ХИФУ II курсун студеныгар, спорт маастарыгар, СӨ норуоттарын VI Спортивнай оонньууларын чемпионкатыгар, хотугу многоборьеҕа РФ чемпионатын призеругар Алена Колтовскаяҕа иҥэрилиннэ.

2014 сыл бастыҥ тренеринэн оройуон сүүмэрдэммит хамаандатын чэпчэки атлетикаҕа тренерэ Колтовской Валерий Алексеевич буолла.

Оройуон дьаһалтатын уонна Өлөөн национальнай нэһилиэгин дьаһалтатын анал бириистэрин спортивнай күрэхтэһиилэр кыайыылаахтарыгар, призердарыгар, спортивнай хамсааһын тэрийээччилэригэр, тренердэргэ үөрүүлээх быһыыга-майгыга туттарыы кэнниттэн, Өлөөн эбэҥки национальнай оройуон дьаһалтатын баһылыга Александр Иванов тэрийэр комитет аатыттан оройуон спортивнай хамсааһынын салайааччыларын, тренердэрин, спортсменнары уонна оройуон олохтоохторун оройуон сүүмэрдэммит хамаандата СӨ норуоттарын VI Спортивнай оонньууларыгар кыайыылааҕынан тахсыбытынан итиитик-истиҥник эҕэрдэлээтэ уонна өйдөбүнньүк диплому, Кубогы уонна УАЗ массыына сертификатын оройуон сүүмэрдэммит хамаандатыгар туттарда.

Чөл олоҕу өрө тутан, нэһилиэнньэни маассабай спортивнай хамсааһыҥҥа угуйан үрдүк спортивнай ситиһиилэри хааччыйыыга таһаарыылаахтык үлэлээбит спортивнай хамсааһын тэрийээччилэригэр Николай Семеновка, Владислав Семеновка, Валерий Колтовскойга, Ия Федороваҕа, Николай Николаевка, Григорий Федоровка, Платон Семеновка, Ольга Петроваҕа, Владимир Федоровка, Надежда Константиноваҕа, Прокопий Федоровка, Дмитрий Скороходкиҥҥа уо.д.а. махтал тыллара этилиннэ.