Бокска Россия чемпионата Дальнай Восток уокуругун киинигэр сэтинньи 22-30 күннэригэр ыытылынна. Манна Россия 60 субъегыттан 250 боксер күөн көрүстэ. Оттон Саха сирин Василий Егорову тэҥэ, спорт маастара Ян Максимов, Егор Евсеев (49 кг), 2007 сыллаах дойду боруонса призера Семен Степанов, Гаврил Попов (52 кг), Александр Зайцев (69 кг) көмүскээтилэр.

Василий Егоров саамай чэпчэки ыйааһыҥҥа финал түөрт гыммыт бииригэр Басызбек Баратовы (Москва) ыраахтан сылдьан, иккис нүөмэринэн үлэлээн, 3:0 кыайар. Финал аҥаарыгар Василий Егоров Хабаровскай кыраайы көмүскүүр, ол эрэн бэйэбит уолбутугар Александр Самойловка тахсан, үчүгэй атаакалары оҥортоон, эмиэ кыайар. Финалга бурят Бэлик Галановтыын көрүстэ. Иккис түһүмэхтэн ыла бурят баһыйара билиннэ. Вася ыраахтан атаакалыы сатаата да, бурят үчүгэйдик көмүскэннэ. Арааһа, киирсиэн иннинэ Вася стилин үчүгэйдик үөрэппит быһыылаах. Иккис түһүмэххэ Бэлик чэпчэкитик киирсэн, хаста да тапта. Атаака үксэ биһиэнэ, ол эрээри, Вася таптарара элбэх этэ. Онон, 0:3 ахсаанынан хоттордо. Уопуттаах спортсмен эдэр эрчимнээх уолу бу сырыыга баһыйда.

Ол эрээри, тренердэр, бокс специалистара быйыл бастакытын улахан дьоҥҥо кыттыбыт Вася Егоров бу ыйааһыҥҥа аҕыйах сылынан дойду хамаандатын лидердэриттэн биирдэстэрэ буолуоҕа диэн этэллэр. 20 саастаах эдэр уолга бу олус үчүгэй көрдөрүү.