Кини муус устар 2 күнүгэр улуус баһылыга А.В. Григорьевы, улуус киинин тэрилтэлэрин юристарын, оройуон судьуйатын, прокурорун кытта дьыалабыай көрсүһүү оҥордо.

Республика Конституционнай суутун Бэрэссэдээтэлэ правовой билиини, суут-сокуон туһунан билсиһиннэриини оскуолаттан саҕалыыр ордугун бэлиэтиир. Оройуон суута, прокуратура, полиция үлэһиттэрэ кэмиттэн кэмигэр оскуолаҕа кэлэн араас бэсиэдэлэри оҥороллоро туһаттан атыны аҕалыа суоҕун, манна библиотекалар кыттыһаллара ордук көдьүүстээх буолуоҕун этэр. Улуус дьаһалтатын правовой отделын сүрүннүүр специалиһа Н.М. Морозова нэһилиэктэри кытта правовой үлэҕэ баар ыарахаттар тустарынан кэпсээтэ. Оройуон прокурора А.Н. Винокуров сылын аайы биһиги улууска оҕолор отуттан тахса араас буруйу оҥороллорун ыйан туран, эрдэттэн сэрэтэр, өйдөтөр үлэ ыытыллара наадатын эттэ.

Александр Николаевич нэһилиэктэр устааптарын оҥорууга уустуктар бааллар, манна республика өттүттэн куратордар өссө күүскэ үлэлэһэллэрэ наада диэтэ. Устаап диэн нэһилиэк, улуус да сүрүн нормативнай-правовой докумуона, Конституцияларын тэҥэ диэн сыаналыыр. Оттон оройуон федеральнай сууутун бэрэссэдээтэлэ А.Н. Тарабукин биһиэхэ суут үлэтэ аһаҕас. Интэриэһиргиир өрүт олохтоммут бэрээдэк быһыытынан суукка хаһан баҕарар сылдьыан сөп. Ол курдук колледж, гимназия үрдүкү кылааһын оҕолоро суут барар процеһын интэриэһиргээн сылдьар түгэннэрэ баарын эттэ. Суут туһунан биһиги анал сайтпытыгар киириэн көрүөххэ сөп. Улууска 3 федеральнай, 1 мировой судьуйа үлэлииллэр. Мировой судьуйа иккис учаастагын аһар туһунан боппуруос көрүүгэ сылдьар диэтэ.

Санаа үллэстибит дьон бары даҕаны улууска Интернет үлэтэ олус бытаанын, ол үлэҕэ-хамнаска олус охсуулааҕын эттилэр. Сокуоннарбыт уларыйа тураллара да түргэнэ бэрт, биһиги Интернеппит, бэл, ону «сиппэт».

Түмүккэ А.Н. Ким-Кимэн улуус баһылыга юридическай Сэбиэт тэрийиэн сөбүн туһунан эттэ.

А.Н. Ким-Кимэн республика биир биллэр-көстөр улахан политигын тэҥэ, эмиэ чөл олох ахсаабат пропагандиһа. Ол курдук, кини сахалыы ыстаныыларга РСФСР, оҕунан ытыыга РФ спордун маастара. Ол да иһин кини бу сырыытыгар чэпчэки атлетика манеһыгар улуус спортсменнарын, ыччаттарын кытта көрсөн ирэ-хоро кэпсэттэ. Бордоҥҥо тахсан бильярд кулуубун үлэтин кытта билистэ. Элгээйи оскуолатыгар үөрэнээччилэри кытта көрүстэ.

Республика Конституционнай Суутун бэрэссэдээтэлэ Александр Ким-Кимэн уонна улууспут баһылыга Анатолий Григорьев бииргэ үлэлэһэр туһунан сөбүлэһиигэ илии баттаатылар.