Дьокуускай куоракка автобуһунан айан сыаната иккилии сыл буола-буола үрдүүр. Быйыл сыана от ыйын 1 күнүттэн үрдүүрүн этэллэр.

Бу туһунан “Саха сирин” кэрэспэдьиэнэ куорат дьаһалтатын тустаах үлэһититтэн ыйыталаста.

Саргылаана Захарова, Дьокуускай куорат дьаһалтатын экономикаҕа департаменын сыананы оҥорууга отделын начаалынньыга:

- Дьокуускай куоракка уоннатаһынааҕы нэһилиэнньэлээх пууннарга дьону таһыы өҥөтүн сыанатын былаан быһыытынан үрдэтэбит. Бу үрдээһин экономическай кириисиһи кытта сибээһэ суох. Төһө буолуохтааҕын ааҕа-суоттуу сылдьабыт. Билигин өҥөнү оҥорор тэрилтэлэри кытары кэпсэтии барар. Биллэн турар, кинилэр элбэҕи этэ сатыыллар, биһиги тута сатыыбыт. Ол курдук, бэс ыйын ортотугар ааҕыыны түмүктээн, икки өрүт сөбүлэспит сыыппаратын куорат мэрэ Айсен Николаев көрүүтүгэр киллэриэхпит.

Билиэт сыанатын ааҕыыга автобус суоппарын, кондукторын хамнаһа киирэллэр. Манна уматык-оҕунуох сыанатын үрдээһинэ, итини тэҥэ саҥа автобустары лизининэн атыылаһыы уонна гаражтары көрүү-истии, техника өрөмүөнэ төһө үбү эрэйэллэрэ ааҕыллар.

Куорат таһынааҕы маршруттарга төһө пассажир айанныыра сыананы быһыыга эмиэ учуоттанар. Холобура, аҕыйах пассажирдаах маршрут сыаната үрдүк соҕус буолуон сөп. Манна биири өйдүөххэ наада. Куорат таһынааҕы маршруттар автобустара ороскуоттарын кыайан сабымматтар. Ону сороҕун куорат бүддьүөтэ уйунар.

Билиҥҥи сабаҕалааһынынан, бары маршруттарга сыана 6 % үрдүөҕэ. Бу былааннаммыт уларыйыы потребительскэй сыана индексинэн оҥоһуллар.