Тааттаҕа үс улууһу чоҕунан хааччыйар суол быһынна


Олохтоохтор кэпсииллэринэн, итиннэ билигин үрэх уута туолан аҕай турар. Тыа уута эбиллэн, «УАЗ» массыына тыраахтар арыала суох ааспат буолбут.
Иллэрээ сыл уу айан суолун алдьатан, олохтоохтор дьон ааһарыгар анаан түөрт улахан тиити кэрдэн уһаты бырахпыттара, онон кыра оҕолор, кырдьаҕастар түөрт атах буолан туораабыт түгэннэрэ баара. Быйыл эмиэ ол хартыына хаттаан хатыланна.

Баһылык санаата
Таатта улууһун Туора Күөл нэһилиэгин баһылыга Олег Осипов:
- Биһиги, туора-күөллэр, сыл ахсын Уһун Эбэ диэн улахан күөлбүт уутун аллараа Наммара үрэҕинэн ыытабыт. Быйыл лаҥхалаах буолан, уу бытааннык устар. Эбиитин тыабыт уута киирэн, үрүйэлэр кыайан ыыппаккалар, суолбутун алдьатта. Билиҥҥи туругунан, суол быстан турар. «УАЗ» массыыналар иккилии-үстүү тыраахтар арыаллаах сылдьаллар. Өрөмүөн үлэтэ ыытыллыахтаах. Бастаан экскваторынан хаһан уутун ыытыахтарын наада. Быйыл вездеходу сырытыннарбат курдук туруорустубут. Вездеход сымнаҕас сири тоҕута кэһэн кэбиһэр, кэлин онон туох да сылдьыбат. Ааспыт кыһын Бүлтэкис диэн сиргэ кыһыл кумах кутуллубута. Онтубут чиҥээбэккэ турар. Суол икки өттө уулаах. Дьыбаҥ диэн сиргэ суол турбата ууга устар кутталлаах. Уопсайынан, ыксаллаах быһыыны-майгыны биллэриэххэ наада. 10 км усталаах суол бырайыагын оҥорторо сылдьабыт даҕаны, инникитин гравий суол оҥоһулларын саарбахтыыбын. Биһиги суолбут бүтүн үс улууһу хааччыйар суол буоларын умнумуохха наада.

Таатта улууһун баһылыгын бастакы солбуйааччы Николай Унаров:
- Уулаах дьыллар буолан, Дэбдиргэлиир суол сыл аайы алдьанан, айан-сырыы хаайтарар. Ыам ыйын 30 күнүттэн манна өрөмүөннүүр биригээдэ үлэтин саҕалаата. Уутун-хаарын сүүрдэн, аппаларга, сымнаҕас сирдэргэ буор кутуллуохтаах. Ити үлэни чааһынай тэрилтэлэр оҥоро сылдьаллар. «Трансдорпроект» тэрилтэ нөҥүө бу суолга 10 км усталаах учаастак сметатын оҥорторо сылдьабыт. Ыһыахха диэри суолу көннөрөр санаалаахпыт.

Таатта улууһун «Дорстрой» МУП салайааччыта Анатолий Бочуруков:
- Чахчы, Туора Күөл, Дэбдиргэ суоллара алдьанан тураллар. Суол алдьаммытын туһунан официальнай акт оҥорбуппут. Билиҥҥитэ үлэ сметата оҥоһулла сылдьар. Ол бүттэҕинэ, гос-сакаас аукционугар тахсыахтаах. Бу аукциоҥҥа биһиги тэрилтэбит кыттар. Кыайдахпытына үлэлиэхтээхпит. Ыксаллаах быһыы-майгытахсыбытын туһунан иһитиннэрии тахсара буоллар, суол түргэнник оҥоһуллуо этэ. Тоҕо диэтэххэ, ЫБМ балаһыанньатыгар бэдэрээт аукциона суох бэриллэр. Бүтүн икки нэһилиэк суола суох олорор түгэнэ ыксаллаахха киириэн сөп дии саныыбын.

Олохтоохтор санаалара

Марина Саввина, Туора Күөл олохтооҕо:
- Сыллата эрэй бөҕөтүн көрөбүт. Киһи улуус киинигэр киирэрэ даҕаны уустуктардаах. Суол суоҕуттан ас-таҥас, мал-сал, эмп-томп кэлэрэ быстар. Былырыын бурдук, саахар кырыымчык этэ. Аны хамнаспыт баан карточкатыгар түһэр. Онтон харчы устарга улуус киинигэр сатыы киириэххэ наада. Аныгы үйэҕэ түөрт аҥаар көстөөх суол оҥоһуллара уустугун дьиибэргии саныыбын.

Александра Варламова, Туора Күөлтэн төрүттээх эдэр үлэһит:
- Мин дойдубар сылдьыбатаҕым ыраатта. Истэр тухары сайынын суол суох. Кырдьаҕастар, кыра оҕолоохтор эрэйи көрөн эрдэхтэрэ.

Татьяна Захарова, Туора Күөл олохтооҕо:
- Суола суоҕуттан эрэйдэннибит. Билигин сотору оҕолор үөрэххэ туттарсаары докумуон эккирэтиһиитигэр, доруобуйаларын көрдөрүнэ киириэхтэрэ. Биһиги суолбутунан үс улуус туһанар. Онон суол оҥоһулуннар бары да абыраныа этибит.



Суолга эрэйдэммит айанньыттар хаартыскаҕа түһэриилэрэ.