Ол туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.

Санатар буоллахха, Ньургун Уаров диэн Дьокуускай куорат 41 саастаах олохтооҕо ааспыт сыл балаҕан ыйын 6 күнүгэр сураҕа суох сүппүтэ. Ити күн кини «Восточная лилия» диэн Кальвица - Дзержинскэй уулуссалар быысаһыыларыгар турар ресторантан 23.50 тахсыбыт этэ. Тас таҥаһын гардеробка хаалларан баран. Кини сүппүт чахчытынан РФ Холуобунай кодексатын 105-с ыстатыйатын 1 чааһынан холуобунай дьыала тэриллибитэ. Ол эбэтэр, киһини соруйан өлөрүү бэлиэтэ баарынан.

Дьэ, уонна сыл аҥарыттан ордук кэм ааспытын кэнниттэн, муус устар 27 күнүгэр, Ньургун Уаров өлүгэ Дьокуускай куорат Кальвица уонна Ф.Попов уулуссаларын икки ардыларыгар баар тоҥон турар күөлтэн көһүннэ. Барыллаан бэрэбиэркэ быһаарбытынан, кини өлүүтүгэр криминал суола суох курдук.

Маныаха Ньургун Уаров сүппүт сириттэн олох чугас көстүбүтүн бэлиэтиир наада. Күһүн ити күөлгэ көрдүү сатаабыттар эрээри, водолазтар олохторугар уонна доруобуйаларыгар кутталлаах, мунньуллубут ол-бу тимир бөх (арматура уо.д.а) мэһэйдээн, оччолорго кыайан булбатахтар. Билигин өлүү биричиинэтин быһаарар сыалтан судебнай-медицинскэй экспертиза анаммыт, дьыала салгыы силиэстийэлэнэр.   

Ньургун Валерьевич Уаров – урут милииссийэҕэ силиэдэбэтэлинэн үлэлээбит, астаапкаҕа сылдьыбыт ис сулууспа майора. Бүтэһик үлэлээбит сирэ – «Алмазэргиэнбаан».