Дохсун ардахтар түмүктэригэр Таатта улууһугар уустук быһыы-майгы бүрүүкээбитин – кырыы нэһилиэктэргэ суол-иис, сибээс, уот быстыбытын туһунан сырдатан турабыт. Ол эрээри, саха дьоно барахсан үйэ-саас тухары тыйыс айылҕалыын алтыһан үөскээбит буолан, тирээн турар кыһалҕаттан саллан сууланан кэбиспэккэ, араастаан быыс-хайаҕас була, олох иһин туруулаһа сатыыр...

Холобура, Уус Таатта уонна Уолба икки ардынааҕы 60 километрдаах суол быстан, икки нэһилиэк дьоно Алдан өрүһүнэн, ыаллыы улуус – Томпо сиринэн эргийэн Ытык Күөлгэ тиийэллэр. Айаннарын бастакы аҥарын Мэҥэ-Алдаҥҥа диэри мотуордаах оҥочонон бараллар, салгыы массыынаҕа көһөллөр. Бу суол төһө эргиирдээҕин, уһунун иһин, дьон “бачча быстарыкка баарыгар баһыыба” диэн араас кыһалҕаларыгар маннык айанныырга күһэллэллэр эбит...

Эмискэ Мэҥэ-Алдан уонна Уус Таатта икки ардыгар айаннаан иһэр мотуордаах оҥочо ууга тимирбитигэр оскуола үөрэнээччи Эдик Сидоров оҕолоох дьону быһаабытын туһунан соһумар сурах бу өрөбүллэргэ WhatsApp (Ватсап) социальнай ситиминэн кэлбитэ. Билэр дьоммуттан сураспытым – сурах чахчыта бигэргэммитэ...

Ол кэнниттэн “Алдан нэһилиэгэ” МТ дьаһалтатыгар эрийбиппэр специалист Анна Дягилева маннык чахчыны иһитиннэрдэ:

-- Бэс ыйын 19 күнүгэр Мэҥэ-Алдантан төннөн иһэр таксист ыытан иһэр мотуордаах оҥочото, киэһэ тоҕус аҥаар чаас диэки, Лэкэ Хайа аттыгар Алдан өрүс сүрүн үөһүгэр саахалламмыт. Дьон этэринэн, “моторкаҕа” кэннинэн уу киирэн корпус өрүскэ тимирбит. Уон киһи, ол иһигэр үс оҕо ууга түспүттэр. Үгүстэр, хата, бэйэлэрэ кытылга харбаан тахсан быһааммыттар.

Оттон быйыл Н.Д.Неустроев аатынан оскуоланы бүтэрбит Эдуард Сидоров Кучуровтар дьиэ кэргэннэрин – биир сааһын үс ый ааспыт оҕону уонна кини төрөппүттэрин өрүһүйбүт. Быһылаан буолбутугар ыал аҕата Егор оҕотун кууспутунан ууга түһэн кытылгы диэки харбыы сатаабыт да сүүрүккэ оҕустаран ырааппатах. Ыксаан, тимирэн истэҕинэ, Эдик көрөн устан дагдайа сылдьар суумканы биэрбититтэн тардыстан Егор оҕотунаан кытылы булбуттар. Ону тэҥэ уол атын аргыстарын докумуоннаах, ноутбуктаах, телефоннаах, симэхтээх суумкаларын ууттан хостообут. Тимирбит оҥочо корпуһун кэлин хостообуттар этэ.

Өлөр өлүү дэгиэ тыҥыраҕыттан кыл мүччү куоппут Кучуровтар ыксаллаах быһыыга-майгыга хорсунун көрдөрбүт уол – Эдуард Григорьев оскуоланы бүтэрбит банкетыгар тиийэн, бииргэ үөрэммит доҕотторун, учууталларын, төрөппүттэр иннилэригэр эдэр геройга махтал тылларын эппиттэр уонна тус бэлэхтэрин биэрбиттэр. Бу эҕэрдэҕэ кыттыһан туран, Алдан нэһилиэгин баһылыга Игнатий Постников эр санаалаах уолга дьон-сэргэ аатыттан махтал сурук туттарбыт.

Быһылааҥҥа түбэспит ыал аҕата, 37 саастаах Егор Кучуровтыын кэпсэттим:

-- Уолбут Эрчим биир сааһын ааста. Кэргэним Наталья Николаевна оҕотунаан Хачыкааттан кэлэн испиттэрэ. Суол-иис куһаҕан буолан, мин кинилэри Ытык Күөлгэ тиийэн көрсүбүтүм. Ол төннөн иһэн бу быһылааҥҥа түбэстибит. Дьиҥэ, ардаҕа, улахан тыал суох күн этэ. Мотуордаах оҥочоҕо онуо этибит. Сэттэ улахан киһини кытта үс оҕо – Эдик, сэттис дуу, ахсыс дуу кылаас кыыһа уонна биһи биирин ааспыт уолбут бааллара.

Быйыл оскуоланы бүтэрбит Эдуард Сидоров суоҕа буоллар биһиги дьиэ кэргэн тимириэх эбиппит... Маҥнай кэргэним истээх саппыкыта баттаан тимирэн истэҕинэ уһуларыгар көмөлөспүтэ. Мин уолбун кууһан баран харбаан иһэн тимирэн эрдэхпинэ, дагдайа сылдьар “баул” суумкабытын аҕалан биэрбитэ. Эдик ол иннинэ, ийэтин көрөн-истэн кытылы булларбыта.

Мотуордаах оҥочо ыйааһыммытын уйбатах буолуон сөп. Таксист ороскуоппутун төлүөхтээх...

Онон бэс ыйын 19 күнүгэр киэһэ тоҕус аҥаар чаас диэки, Алдан өрүс сүрүн үөһүгэр сахалыы аата Лэкэ Хайа, киэҥник биллэринэн “Мамонтовая Гора” аттыгар, мотуордаах оҥочо саахалыгар түбэспит. Онуоха, Уус Таатта Н.Д.Неустроев аатынан оскуолатын быйылгы выпускнига Эдуард Николаевич Сидоров ууга былдьана сыспыт эдэр ыалы – Наталья Николаевна, Егор Егорович Кучуровтары уонна кинилэр биир сааһын үс ый ааспыт уолларын Эрчими өрүһүйбүт. Олох киэҥ аартыгар саҥардыы үктэнэн иһэн эр санаалааҕын көрдөрбүт эдэр геройу өрөспүүбүлүкэ, дойду салалтата үрдүк сыаналыа диэн эрэнэбит!