Биһиги республикабыт суутун уорганнара биир холуобунай дьыалаҕа бэйэ-бэйэлэрин утарсар икки уурааҕы таһааралларынан аны соһуппат буолан тураллар. Кун бэ5эьээ өссө биир айдааннаах дьыалаҕа бириигэбэр таҕыста.

Санатар буоллахха, СР Олох-дьаһах хаһаайыстыбатын уонна энергетика министрин урукку солбуйааччыта Вадим Ракитиҥҥа холуобунай дьыала 2012 сыл бүтүүтүгэр тэриллибитэ. Бу дьыала РФ Куттал суох буолуутун федеральнай сулууспатын Саха сиринээҕи управлениетын суһал-ирдиир тэрээһиннэрин түмүгэр биллибитэ. Силиэстийэ уорганнара министри солбуйааччыны маҥнай утаа 300 тыһ.солк. суумалаах бэриги түүрэйдээн ылыыга уорбалаабыттара. Суут быһаарыытынан, барыллааһын силиэстийэ кэмигэр Ракитин 1 №-дээх силиэстийэлиир изоляторга хаайыллыбыта.

Ааспыт сыл олунньу ыйыгар Дьокуускай куорат федеральнай суута буруйданааччы Ракитиҥҥа хаарчахтыыр миэрэтин уларытан, 500 тыһ.солк. суумалаах солуогунан көҥүлгэ таһаарбыта.  Солуогу Ракитин ойоҕо киллэрбит этэ. Барыллааһын силиэстийэ бүппүтүнэн, силиэдэбэтэл да, судаарыстыбаннай буруйдааччы да, адвокат да бу хадатаайыстыбаны  утарбатахтара. Дьыала кулун тутар ыйга суут көрүүтүгэр барбыта.

Ааспыт сыл алтынньы 23 күнүгэр Дьокуускай куорат федеральнай суутун судьуйата Татьяна Егорова СР ОДьХКХ министрин урукку солбуйааччыта Вадим Ракитиҥҥа быыһыыр бириигэбэр таһаарбыта. Дакаастабыллар чахчыта суохтар, кини дьайыытыгар буруйу оҥоруу састааба суох диэн. Маны таһынан, сууттанааччыга реабилитацияланар, материальнай компенсацияны туруорсар быраабы биэрбитэ. Бириигэбэри кытта сөбүлэспэккэ, прокуратура СР Үрдүкү суутугар ааһыммыта.

Ааспыт сыл ахсынньы 12 күнүгэр СР Үрдүкү суутун холуобунай дьыалаларга коллегията прокуратура этиилэригэр («доводы») сөбүлэһэн, Дьокуускай куорат федеральнай суутун быыһыыр бириигэбэрин көтүрбүтэ. Бастакы суут уурааҕа холуобунай-процессуальнай сокуону кэһиилэрдээх тахсыбыт диэн. Уонна Ракитин дьыалатын саҥаттан көрүүгэ ыыппыта.

Дьэ, уонна бу дьыл муус устар 28 күнүгэр Дьокуускай куорат федеральнай суута Вадим Ракитиҥҥа бириигэбэр таһаарда. Бастаан утаа бэриги түүрэйдээн ылыыга буруйдаммыт киһи кэлин ыстатыйата уларыйан (сымнаан), сулууспа балаһыанньатынан туһанан, түөкүннээһиҥҥэ суудайыыга буруйдааҕынан билинилиннэ (РФ Холуобунай кодексатын 159-с ыст. 3-с чааһа – 30-с ыст. 3-с чааһа).

Суут быһаарбытынан, Ракитин 2012 сыл ахсынньытыгар министри солбуйааччынан үлэлиир кэмигэр "Служба эксплуатации городского хозяйства" муниципальнай тэрилтэ салайааччытыттан албыннаан туран, 650 тыһ.солк. сууманы ыла сатаабыт. Дьокуускай куорат дьиэлэрин өрөмүөннээһиҥҥэ республика бюджетыттан уонна ОДьКХ фондатыттан үбү-харчыны ыларга көмөлөһүөм этэ диэн. Харчытын сороҕун ылар кэмигэр УФСБ оперативниктара туппуттар.

Өрүттэр (прокуратура уонна сууттанааччы адвоката) бу бириигэбэри СР Үрдүкү суутугар ааһыналларын-суоҕун туһунан билиҥҥитэ ханнык да иһитиннэрии суох. Дьыалаҕа бүтэһиктээх туочука тура илик.