«Биһиги Бакуга күрэхтэһии буолуо икки нэдиэлэ иннинэ кэлбиппит. Олохтоох кыттааччылар олус истиҥник көрсүбүттэрэ. Уопсайынан күрэхтэһии олус үрдүк таһымнаахтык тэриллибитин бэлиэтиэх этим», - диэн кини суруналыыстарга кэпсээтэ.

Бастакы хапсыһыыга 14:2 ахсаанынан кини Швейцарияттан сылдьар  Амханд Мехдини кыайбыт, оттон финал чиэппэригэр Хорватия спортсменын  Джарлонни Стиппы 16:4 ахсаанынан хоппут. Полуфиналга Руслан Поисеевы  Партугалияттан сылдьар, урукку утарсааччыта  Руи Педро Браганка  8:11.ахсаанынан кыайары ситиспит.

«Мин кинилиин төрдүс төгүлбүн күөн көрсөбүн. Бастакы хапсыһыыны кини, ол кэннинээҕи икки кыайыыны мин ылбытым. Онтон бу сырыыга кини ордон таҕыста. Браганка финалга тахсан, чемпион үрдүк аатын ылары ситистэ», - диир Саха сирин эдэр спортсмена. 

«Финал чиэппэригэр киирсэн бүтээт саҥардыы чөлүгэр түһэрэр массажка бэлэмнэнэн эрдэхпинэ, тута рингэҕэ ыҥырбыттара. Утарсааччыбар элбэх бириэмэлээҕэ, баҕар, көрдөрүгэ дьайбыт да буолуон сөп», - диир  Руслан Поисеев.

Казань куоракка буолар дойду чемпионатыгар кини бэлэмнэнэр. Манна Россия сүүмэрдэммит хамаандатын састааба, аан дойду чемпионатыгар 2016 сылга Бразилияҕа буолар Олимпиада кыттааччылара быһаарыллыахтара.