Саха сирэ быыбары ыытыыга эрэ буолбакка, атын саҕалааһыҥҥа үгүстүк биллэр-көстөр. Саха ыччата көхтөөҕө уратытык бэлиэтэнэр. Ол да иһин буолуо, «Биир ньыгыл Россия» буолаары турар барыллаан куоластааһыныгар  Егор Борисов  кандидатуратын «Эдэр Гвардия» регионнааҕы отделениета киллэрдэ.

«Эдэр Гвардия» регионнааҕы салаатын салайааччыта Гаврил Семенов маннык диэтэ: «Бу көҕүлээһиммит туһунан биһиги эрдэ Егор Афанасьевичка этэ сылдьыбыппыт. Ону кини өйөөбүтэ».

Мунньахха кыттыбыт эдэр дьон Егор Борисов кандидатуратын 100 бырыһыан өйөөтүлэр. Бу туһунан сибидиэнньэ «Биир ньыгыл Россия» регионнааҕы салаатын салалтатыгар тиэрдиллиэҕэ.

«Биир ньыгыл Россия» - праймериһы ыытар суос-соҕотох партия. 2007 сылтан ыла «Биир ньыгыл Россия» өйөбүлүнэн бөһүөлэктэн саҕалаан субъект баһылыгар, о.д.а. үрдүкү дуоһунаска бука бары партия иһигэр ыытыллар куоластааһыҥҥа кыттыахтаахтар. 2009 сыл сэтинньитигэр маннык процедура партия устаабыгар киирбитэ. «Биир ньыгыл Россия» партия устаабын быһыытынан партия иһинээҕи куоластааһын быыбар кампаниятын саҕана саҕаланар. Праймеризка аҥаардас партия чилиэннэрэ эрэ буолбакка, уопсастыбаннай хамсааһын бэрэстэбиитэллэрэ, партията суохтар кыттар бырааптаахтар.

Муус устар 29 күнүгэр «Биир ньыгыл Россия» регионнааҕы политическай сэбиэтин мунньаҕар праймериз туһунан партия исполкомун салайааччытын бастакы солбуйааччы Леонид Шибаев билиһиннэрдэ. Кини эппитинэн, ыам ыйын 12 күнүгэр диэри кандидатуралар тула этиилэри хомуйуохтара. Ол кэнниттэн куоластааһын буолуоҕа. Бу чэрчитинэн кандидаттар быыбардааччылары кытта крсүөхтэрэ. Саамай элбэх куолаһы ылбыт кандидаты регионнааҕы конференция дьүүллэһиэҕэ. Конференция делегаттара партияттан регион баһылыгын быыбарыгар турар кандидаты быһаараллар.