КНР председателэ  Си Цзиньпин Россия уонна Кытай хардарыта дьайсыылара эргиччи туһалааҕын уонна табыгастааҕын туһунан эттэ. «Биһиги дойдуларбыт дьоно-сэргэтэ  хардарыта дьасан бииргэ үлэлиир политикабытын улаханнык өйүүр. Ситиһиллибитинэн муҥурданан, бүтэн-оһон хаалыа суохтаахпыт. Салгыы өссө улахан ситиһиилэнэр туһугар тулуурдаахтык, толкуйдаахтык дьулуһуохпут», – диэтэ кини.

Россия президенэ  Владимир Путин Кытай уонна Россия хардарыта үлэлээһиннэрэ саҥа историческай кэрдиискэ, кирбиигэ тахсыбытыгар мустубут дьон болҕомтотун тарта. 2013 сылга бу дойдулар икки ардыларыгар табаар эргиирэ 2% үрдээн 90 млрд долларга чугаһаабыт. 2014 сыл бастакы үс ыйыгар көрдөрүү 2% биллэ аһарбыт. 2015 сылга 100 млрд долларга диэри тиийиэхтээҕин кини чиҥэтэн эттэ.

Владимир Путин атыы-экономическай сибээс ахсаана эрэ буолбакка, хаачыстыбата эмиэ биллэ үрдүүрүгэр эрэнэрин эттэ. Инвестицияҕа хардарыта үлэлээһин көдьүүстээх буоларын ойуччу тутта. «Харбиҥҥа бу сайын бастакытын Россия уонна Кытай ЭКСПО быыстапкатын ыытыахпыт», - диэтэ Россия баһылыга.

Россия Кытай доҕотторун 2015 сылга Екатеринбург куоракка ыытыллар «ИННОПРОМ» норуоттар икки ардыларынааҕы промышленнай быыстапкаҕа ыҥырда. Аан дойду бигэ туруктанарыгар бу хардарыта дьайсыы улахан суолталааҕын В.Путин эттэ. «ХНТ, о.д.а. аан дойду тэрилтэлэригэр биһиги доҕордуу сыһыаммыт ылар оруола улаатан, үрдээн иһэр. Сибээспит өссө ыга, күүстээх уонна көдьүүстээх буоларын туһугар элбэҕи үлэлиэхпит, ол иһигэр Шанхайскайдааҕы тэрилтэҕэ эмиэ», - диэтэ РФ президенэ.

Кэпсэтиһии чэрчитинэн правительстволар, регионнар, биэдэмистибэлэр, корпоративтар икки ардыларыгар элбэх сөбүлэһии түһэрсилиннэ.

Күн иккис аҥаарыгар  Егор Борисов РФ официальнай делегациятын састаабыгар киирэн Кытай бизнес эргимтэтин кытта көрүстэ.

Шанхайга Егор Борисов Кытай бөдөҥ тэрилтэлэрин кытта сибээһи олохтоото. Саха сирин кытта инникитин хардарыта үлэлиэххэ сөбүн эрдэттэн кэпсэттэ. Ону таһынан Егор Афанасьевич федеральнай министиэристибэлэр уонна биэдэмистибэлэр, дойду бөдөҥ компанияларын салайааччыларын кытта көрсөн элбэҕи ырытта.