«Баай-дуол сороҕун эбэтэр бүтүннүүтүн халаан уутугар былдьаппыт дьоҥҥо төлөбүр кээмэйэ 5-тэн 20 тыһ. солк. диэри халбаҥныыр. Хас эмэ уонунан сыл мунньуммут баай-дуол ууга барбытын кэннэ ити дуона суох харчыга тугу атыылаһыахха сөбүй? Экономика, үп, үлэ уонна социальнай сайдыы министиэристибэлэрэ төлөбүрү улаатыннарар туһунан толкуйдуохтаахтар», - диэтэ Анатолий Скрыбыкин.

Бэс ыйын 19 күнүгэр правительство мунньаҕар Үөһээ Халыма улууһугар халаан содулун туоратыыга туох-ханнык иннинэ ылыллар миэрэлэри ырыттылар. Халаан кэмигэр 177 тиэргэн ууга былдьаммыта. Айылҕа иэдээниттэн баайы-дуолу сүтэрии туһунан уонна ону толуйууну 209 ыал көрдөспүт. Барыллаан ааҕыынан, итиниэхэ 8 мөл. солк. наада. Саха Республикатын баһылыгын э.т. Егор Борисов ыйааҕынан Үөһээ Халыма улууһугар регионнааҕы таһымнаах ыксаллаах быһыы-майгы биллэриллибитэ.

Анатолий Скрыбыкин сорудаҕынан үөһээ ыйыллыбыт министиэристибэлэр толуйуу төлөбүрүн улаатыннарар туһунан этиилэри 2014 сыл балаҕан ыйыгар диэри бэлэмниэхтээхтэр.