Мунньаҕы РФ-ҕа регионнааҕы сайдыы миниистирэ Игорь Слюняев салайан ыытта. Миниистири солбуйааччы  Валерий Гаевскай, стратегическай сайдыы уонна территориятааҕы былааннааһын государственнай политика департаменын дириэктэрэ Елена Чугуевская, омуктар икки ардыларынааҕы сыһыаҥҥа государственнай политика департаменын дириэктэрэ Александр Журавскай, федеральнай ситэриилээх былаас уорганын бэрэстэбиитэллэрэ, о.д.а. кытыннылар.

- Арктика дойду экономическай сайдыытыгар тутаах миэстэни ылар, - диэтэ мунньах саҕаланыыта Игорь Слюняев.

Хоту улуустарга таһаҕаһы таһыыга ураты улахан болҕомто уурулунна.

СР бастайааннай бэрэстэбиитэлэ Алексей Стручков  Саха сиригэр таһаҕаһы тиэйии болдьоҕун туһунан иһитиннэрдэ.

- Уруккуну кытта тэҥнээтэххэ, быйыл навигация икки нэдиэлэ эрдэ, 2014 сыл муус устар 28 күнүгэр саҕаланна. Уопсайа 1 598,7 тыһ. тонна таһаҕас тиэрдиллиэхтээх, онтон 387 тыһ. тонна - Яна, Индигирка, Халыма, Анаабыр өрүстэргэ, Лаптевтар муораларыгар. Бу сыл бэс ыйын 25 күнүнээҕи туругунан, 408 тыһ. тонна таһаҕас тиийдэ. Ити былырыыҥҥыны кытта тэҥнээтэххэ, 16% элбэх. (Былырыын 396,6 тыһ. тонна этэ),- диэтэ Алексей Стручков.

Хотугу сиргэ таһаҕаһы тиэрдии көдьүүстээх буоларыгар кини кэккэ этиилэри киллэрдэ. Элбэхтэн аҕыйаҕы талан эттэххэ, кини манныгы туруоруста:

- Индигирка, Яна, Халыма, Өлүөнэ өрүстэр түгэхтэрин дириҥэтии бырагырааматын улаатыннарыы;

- СР бырабыыталыстыбата уонна Россиятааҕы агенство бииргэ уматык государство саппааһын үөскэтиилэрин киллэрии;

- Лизиҥҥэ олоҕуран федеральнай бюджет кыттыытынан СР Арктика оройуоннарын уматык-энергетическэй ресурсанан хааччыйыыга «Өрүс – муора» кылаастаах суднолары саҥардыы;

- Хоту сиргэ таһаҕаһы тиэрдэр юридическэй сирэйдэргэ бюджеттан кредит биэрии сүрүн нуормаларын олохсутуу (ст.93.2 БК РФ);

- Индигиркаҕа, Янаҕа гидрометериологическай станцияларга үлэни саҥардыы;

"Хоту уонна онно тэҥнэниллибит сирдэргэ таһаҕаһы тиэрдиини тэрийии эрэ уустук буолбатах, үбү-харчыны, эбии кредити булуу, о.д.а. курдук кыһалҕалар бааллар", - диэтэ Алексей Стручков.

Уу тыраанспарынан таһаҕаһы тиэрдии кээмэйэ биллэ улаатыахтааҕын туһунан кини эттэ. Ити республика сиригэр-уотугар ыытыллар баараҕай бырайыактары кытта ыкса ситмнээх. «Сила Сибири» газ проводын тардарга быйыл 6,1 мөл тонна таһаҕас тиэрдиллиэхтээх. Итинтэн 70% - уу тырааныспарынан.

Алексей Стручков этиилэрин РФ миниистирдэрэ өйөөтүлэр.

Биэдэмистибэлэр икки ардыларынааҕы мунньахха оробуочай бөлөх Арктика социальнай-экононмическай сайдыытыгар анаммыт нуорма-быраап аакталарын олоххо киллэриини, о.д.а. дьүүллэстэ.