РФ президенигэр Саха Республикатын бастайааннай бэрэстэбиитэлэ Алексей Стручков «төгүрүк остуолу» аһарыгар Максим Аммосов көҕүлээһининэн тэриллибит Саха сиригэр ССРС НА бастакы экспедициятын туһунан сырдатта. Экспедиция  айылҕа усулуобуйатын, сир баайын, экономика, олохтоохтор культураларын, олохторун-дьаһахтарын туһунан, ол иһигэр наукаҕа биллэ илик чахчылары, хомуйбута.

«Бүгүн Арктика кыһалҕаларыгар, ол иһигэр Хотугу муоранан сырыыны хаттаан үөдүтүүгэ, регион социальнай-экономическай сайдыытыгар, кырата суох болҕомто ууруллар. Ону тэҥэ, уйан айылҕалаах Арктикаҕа харыстабыллаахтык сыһыаннаһыахтаахпыт, хамсыыр-харамайын араҥаччылыахтаахпыт, олохтоох нэһилиэнньэ үгэс буолбут олоҕун-дьаһаҕын уларытыа суохтаахпыт», – диэн эттэ Алексей Стручков.

Конференция үлэтин сэтинньи 28 күнүгэр түмүктүөҕэ. Программаҕа пленарнай мунньах, «Арктика технологиялара» быыстапка, историяҕа, киһи ис кыаҕын үөрэтиигэ, экологияҕа, энергетикаҕа, тутууга, о.д.а. «төгүрүк остуоллар» буолуохтара.