"Марина Константиновна 87 сааһыгар биһиги кэккэбититтэн туораата. Искусство үлэһиттэрэ, кинини кытта бииргэ үлэлээбит дьон үүнэр көлүөнэ кинини умнубатыгар баҕарабыт. Марина Константиновна биир дойдулаахтара — мэҥэ хаҥаластар кини сырдык кэриэһигэр анаммыт документальнай киинэни эбэтэр кинигэни таһааралларыгар баҕарабыт. Кинини таптаан Эдьиий Марыына диэн ааттыырбыт. Кини кэрэ куоластааҕа, үтүө дууһалааҕа. Саха музыкальнай искусствотын номоҕун быһыытынан биһиги сүрэхпитигэр, дууһабытыгар куруук тыыннаах сылдьыаҕа", - диэтэ культура үтүөлээх үлэһитэ, СӨ норуотун арытыыһа, мелодист Аркадий Алексеев. 

 Саха сирин баһылыгын дуоһунаһын быстах кэмҥэ толорооччу Егор Борисов быһаарыытынан бырабыыталыстыба бэрэссэдээтэлэ Ф.В.Габышева салайааччылаах бырабыыталыста хамыыһыйата Марина Попованы көмүүнү тэрийиэҕэ. 

От ыйын 19 күнүгэр  Мэҥэ-Хаҥалас Быраматыгар сарсыарда 10.00 чааска кинилиин бырастыылаһыахтара.