Бүгүн Саха сирин президенэ Егор Борисов бэйэтин Уурааҕынан опера уонна балет Государственнай театрын директорын Гаврил Местниковы дуоһунаһыттан босхолоото уонна кини оннугар Сергей Сюльскайы анаата. Гаврил Местников театр директорынан иккитэ — 1991-1998 сс. уонна 2004-2013 сс анана сылдьыбыта. Кини көҕүлээһининэн классическай искусство биллиилээх деятеллэрин ыҥыран, үбүлээн, тэрийэн классическай уонна национальнай репертуарынан опера премьералара буолбуттара,"Северный дивертисмент"фестиваллар, Бүтүн Россиятааҕы "Стерх" фестиваль ыытыллыбыттара. Солистар аан дойдутааҕы гастролларга, труппа айымньылаах айаннарга сылдьыбыттара. 90-с сылларга театр художественнай сэбиэтин бэрэссэдээтэлинэн анаммыта. 1992 сылтан — Сибиир уонна Азия опернай театрдарын Ассоциациятын президенин солбуйааччы. Икки нэдиэлэ аннараа өттүгэр Гаврил Местников ОуоБГТ-ын үлэһиттэригэр уопсай дьиэ тутар наадатын туһунан туруорсубута. Саҥа, түөрт уон үһүс театр сезонун аһыллыытыгар 53 мөлүйүөн солкуобай сууммалаах капитальнай өрөмүөн оҥоһуллубута.