Театр айар коллектива быйылгы сезоҥҥа Юрий Григорович «Спартак» балетын туруорууну тулуйбакка-тэһийбэккэ кэтэһэр. Ол эрээри культура миниистирэ Андрей Борисов ааспыт үйэ ортотунааҕы эстетикаттан тэйиэххэ наада диэн санаалаах. Саҥа үүммүт тыһыынча сылга балет искусствотын саҥа, аныгы киэбин көрдүөххэ, булуохха наада диэтэ. Онно театр артыыстара Григорович – номнуо классика диэн хардардылар. Оттон классика – хаһан да кырдьыбат.

Мөккүөрү Егор Борисов тохтотто, театр  классического искусствоны киэҥник тарҕатарга ананарын бэлиэтээтэ.
Егор Афанасьевич манна Опера уонна балет государственнай театра правительство таһымыгар тоҕо өйөнүөхтээх төрүөтүн быһаарда.  Президент быйыл театрга хайаан да икки улахан туруоруу буолуохтааҕын, олортон биирдэстэрэ Юрий Григорович «Спартак» балета туруоруллуохтааҕын эттэ.

Өссө биир киэҥ мөккүөр театр гастроллуур политикатын туһунан буолла. Ааспыт сылга артыыстар республика 32 улуустарыгар сылдьыбыттар. Быйыл  Новосибирскайга улахан гастрол былааннанар.
Итини этэн туран, артыыстар нэһилиэнньэ классическай искусствоҕа интэриэһэ намыһаҕын бэлиэтээтилэр. Ордук ыраах тыа сиригэр. Ити төрүөтүнэн, кинилэр санааларынан, саха радиотын уонна телевидениетын эфиригэр классиканы тарҕатыы суоҕа буолар.

Президент итини олус болҕомтолоохтук ылынна уонна: «Үрдүк кылаастаах артыыстары иһитиннэриэххэ наада. Кинилэри  аудиторияттан кистиир сатаммат», - диэтэ Егор Афанасьевич.

Мантан салгыы хамнас, дьиэ-уот боппуруостарын ырыттылар, ыйыттылар, хардарыта дьүүллэстилэр.
Биллэн турар, театрга кыһалҕа элбэх. Айар коллектив идэтийбит кадрдарга наадыйыыта толуйуллуохтаах. Оркестрга инструменнар тиийбэттэр. Дойду бөдөҥ театрдарыгар уонна тас дойдуларга  стажировка ирдэниллэр.
Республика бэйэтин Государственнай театрыгар болҕомто уурбат диир тутах. Өскөтүн 2012 сыллаахха манна бюджеттан 169 мөл солк бэриллибит буоллаҕына, ааспыт 2013 сыллаахха ити суумма икки төгүл улаатан,  327 мөл солк тэҥнэспитэ.
Ол эрээри Егор Борисов бүгүн театр эбии көмөҕө наадыйарын эттэ.

Бу көрсүһүүгэ Ил Түмэн спикерэ Александр Жирков, правительство вице-премьерэ Феодосия Габышева, республика министерстволарын уонна ведомстволарын салайааччылара кыттыыны ыллылар, диэн республика баһылыгын сайтыгар суруйаллар.