2014 сыл атырдьах ыйын 6 күнүгэр Сунтаар улууһугар Бүлүү өрүскэ сөтүөлүү сылдьыбыт кыыс уу догунугар оҕустаран тимирэн эрэрин көрөн, Денис Иванов уонна Вадим Заболоцкай уолуйбакка, көмөҕө кэлэннэр, кыыһы быыһаабыттара.

«Олоххо куттал суох буолуутун» предмети үчүгэйдик үөрэппит, хорсун уолаттар 13 саастаах кыыһыы өлөр өлүү айаҕыттан өрөһүйбүттэрэ. Кыыһы кытылга таһааран баран уолаттар бастакы суһал көмөнү оҥорбуттар: искусственнайдык тыын киллэрбиттэр. Ол түмүгэр кыыс өйүгэр кэлбит. Суһал көмө массыыната кэлиэр диэри уолаттар кыыһы быраҕан баран хаалбатахтар. Кыыс туругун кыраҕытык кэтээбиттэр.

«Вадим дьоно эппиттэринэн, икки сыл аннараа өттүгэр уол эмиэ тимирэн эрэр кыыһы быыһаан турардаах. Дьиэлэрин таһыгар баар күөлгэ уолаттар куруук сөтүөлүүллэр эбит уонна тимирииттэн быыһаммыт киһиэхэ бастакы көмөнү оҥорго эрчиллэллэр. Ол да иһин, бэлэмнээх буолан кыыһы быыһаатахтара», - диэтэ Сунтаар политехническэй лицей-интернатын 8 "Б" кылаас салайааччыта  Августина Чайнова.

Учуутал эппитинэн, уолаттар иккиэн төһө да саастарынан кыра буоллаллар, улахан киһилии эппиэтинэстээхтэр. Иккиэн дьоҥҥо көмөлөһөргө ураты улахан баҕалаахтарын учууталлара чиҥэтэн этэр. Бу туһунан ЫБММ пресс-сулуспата иһитиннэрэр.