Улууспут аҕа баһылыга А.В.Федотов бэйэтин дакылаатыгар билиҥҥи туругунан улууспутугар 25 объекка тутуу ыытылла турарын, бу сылга 13 объект үлэҕэ киириэхтээҕин туһунан иһитиннэрдэ. үйэлээх тутуу буолан, сыаната да оннук үгүөрү, аҥардас улуус киинигэр 600 мөлүйүөн солкуобай суумалаах тутуу дьэндэйэ сырдыыр. Суол фондата тэриллэн, айаҥҥа-сырыыга уустук суоллаах-иистээх аҕыс нэһилиэккэ суолу тупсарыыга, өрөмүөннээһиҥҥэ, бырайыактааһыҥҥа уопсайа 73 мөлүйүөн солкуобайы туруорсан, федеральнай бюджеттэн 17 мөлүйүөн солкуобай, республикатааҕы бюджеттэн 31 мөлүйүөн солкуобай, улуус бюджетыттан 25 мөлүйүөн солкуобай суума көрүллэн үлэ хайысхалаахтык, тэтимнээхтик барар, Лонгинов уулуссата республикатааҕы суолталаах суол буоларыгар үлэ ыытылла турарын билиһиннэрдэ. ДьУоКХ улуустааҕы филиала 69 хочуолунайы үлэлэтэн, уһун кыһыны саахала суох туоруубут. Соторутааҕыта «Восток» диэн 16 мегаваттаах улахан хочуолунай быйыл үлэҕэ киирэр Мүрүтээҕи уолаттар гимназияларын, үс этээстээх таас-балыыһа комплексын сылааһынан хааччыйыаҕа. Быйылгы сылга өрөмүөҥҥэ 10905,57 тыһыынча солк. көрүллэн, кыстыкка бэлэм буоллулар.

Тыа хаһаайыстыбатынан дьарыктанар улуус буоларбыт быһыытынан, түһэриллибит былааны толорууга көрдөрүү эриэ-дэхси үчүгэй көрдөрүүлээх буолла: уопсай сүөһү ахсааныгар 93,6 %, ыанар ынах төбөтүн ахсааныгар - 101 %, сылгыга - 95,6, эт оөоһуутугар- 114%, үүт ыаһыныгар - 83,6%. Быйылгы оттооһун былаанын 101,84% толорон, республика үрдүнэн үһүс миэстэни ылан, тыа сирэ олоҕо туруктаах буоларыгар эрэлбит улаатта. Билигин сүрүн соругунан – туттарыллар үүт харчытын үрдэтии, былааны ситиһии, онно үлэлэһии буолар.

Улуус социальнай-экономическай сайдыытын программата сотору кэминэн республика экономическай сэбиэтигэр көмүскэниэхтээх. Билигин үс сыллаах бюджет ылыллар буолан, үүнэргэ-сайдарга, былааны толорорго тэрээһин үлэ эрдэттэн ыытылларыгар көдьүүспүт улаатта, инникитин да ситиспит таһыммытын түһэрбэккэ, кэскиллээх үлэни олоххо киллэриигэ улуус олохтоохторо бары түмсүүлээхпитин, биир өйүнэн-санаанан салайтарарбытын көрдөрүөхтээхпит диэн улуус баһылыга тоһоҕолоон бэлиэтээтэ. Улуус инники сайдыытыгар Мүрү нэһилиэгэр 1 Хоро сириттэн 170 га бэриллэн, 800 уһаайбаҕа үллэриллэн бэриллиитэ итиэннэ «Саханефтегазсбыт» тэрилтэтэ уонна СР правительствота быһаарыытынан Бэйдиҥэҕэ 2016 сылга, Бороҕоҥҥо 2017 сылга газ ситимэ кэлэрин туһунан быһаарыыта сайдыы ураты кэрчигэ буоларын туоһулаата.

Инники соруктарынан – сири кытта үлэ, оҥоруу, ходуһалары, бааһыналары нүөлсүтүү, племенной үлэни күүһүрдүү; улуус социальнай-экономическай сайдыытын тосхоллорун олоххо киллэрии; тутуу, өрөмүөн үлэлэрин күүһүрдэн, инвестиционнай программаларга киирсии; дьиэлэргэ, тэрилтэлэргэ тупсаран тутууну киллэрии; Кыайыы 70 сылын үрдүк таһымнаахтык тэрийэн ыытыы буолалларын бигэргэтэн эттэ. «Ити ааттаммыт үгүс ахсааннаах үлэ-хамнас биир киһи эрэ кыайбат сүдү үлэтэ, онон миигин өйүүр, тирэх буолар коллегаларбар, улуус депутаттарыгар, нэһилиэк баһылыктарыгар, общественнай сэбиэт чилиэннэригэр, улуус үлэһит дьонугар дириҥ махталбын тиэрдэбин», - диэн А.В.Федотов бэйэтин этиитин түмүктээтэ.

Уус-Алдан Геройдар улуустара буолара мэлдьэһиллибэт. Былырыын сахалартан бастакы РФ Геройа М.М.Стрекаловскай, саха дьахталларыттан бастакы Социалистическай үлэ Геройа Е.И.Бурцева төрөөбүттэрэ 100 сылларын туолбуттара, быйыл саас сахалартан бастакы РФ үлэҕэ Геройа аатын М.Н.Готовцев дойду Президенэ В.В.Путинтан тутта. Культура сылыгар СР народнай поэта үрдүк аат биир дойдулаахпытыгар И.В.Мигалкиҥҥа иҥэрилиннэ.

Балаҕан ыйыгар буолбут СР Аҕа баһылыгын быыбарыгар биһиги улууспут быыбардааччылара Е.А.Борисов туһатыгар баһыйар куолаһы биэрэн - 73,03 % , республика үрдүнэн үһүс миэстэҕэ таҕыстыбыт. Балаҕаннаах учаастагын быыбардааччылара СР Аҕа баһылыгынан талыллыбыт Е.А.Борисов туһатыгар 100% куоластарын биэрэн, республикаҕа соҕотох итинник көрдөрүүлээх нэһилиэгинэн буоллулар.

 Тахсыылаах үлэ биир ситимнээх буолуутугар, СР Аҕа баһылыгынан Е.А.Борисов талыллыытыгар улуус общественноһа, депутаттара, нэһилиэк баһылыктара көдьүүстээхтик үлэлээн, улууспут баһылыга А.В.Федотов ыытар политикатын өйүүллэрин көрдөрдүлэр. Түмүккэ, улууспут түмсүүлээх, сайдыылаах, кэскиллээх буоларын туһугар хайдыспакка, бииргэ түмсэн, сомоҕолоһон күүскэ турунан үлэлиэҕиҥ диэн улууспут дьаһалтатын баһылыга Алексей Васильевич Федотов ыҥырыыта мустан олорооччулар ытыстарын дохсун тыаһынан доҕуһуолланна.

Салгыы оройуон депутаттарын Сэбиэтин председателэ И.И.Колодезников былырыын балаҕан ыйыгар талыллыбыт оройуон Сэбиэтин үһүс ыөырыытын 23 депутата, бигэргэммит хамыыһыйалар чилиэннэрэ ыыппыт үлэлэрин-хамнастарын, үлэлэрин хайысхатын сиһилии сырдатта. Ыытыллыбыт 11 сессияҕа уопсайа 93 боппуруос дьүүллэһиллэн, сессия быһаарыыта ылыллыбытын туһунан билиһиннэрдэ. Улуус баһылыга А.В.Федотов улуус инники сайдыытын тула үлэтэ түмүктээх буоларыгар биир ситимнээхтик, тэҥ сүбэнэн, өйөбүл буолан үлэлии-хамсыы сылдьалларын туһунан иһитиннэрдэ. «Улууспут баһылыгар инники үлэтигэр саҥа саҕахтары, кыахтары баҕарыаҕыҥ, инники диэки дьулуурдаахтык үлэлиэҕиҥ, бары биир өйүнэн-санаанан айыаҕыҥ-тутуоҕуҥ», - диэн ыҥырыынан оройуон Сэбиэтин председателэ И.И. Колодезников этиитин түмүктээтэ.

Салгыы Мүрү нэһилиэгин дьаһалтатын баһылыга В.И. Аммосов, улуус Ытык Сүбэтин председателэ И.Н.Данилов, Мүрү 2 № орто оскуолатын учуутала Т.Д.Саввинова улуус түмсүүлээх, сомоҕолоһуулаах буолан, олох-дьаһах тупсан, оҕо-уруу элбээн, суол-иис көнөн, саҥа дьиэ-уот, объект элбээн, сибиэһэй ас-үөл дэлэйэн олохпут бигэ туруктаах буоларыгар улууспут баһылыга А.В.Федотов тула түмсэн, кэрэни кэрэһэлиир санааларын тиэртилэр. Дьокуускайтан «Биир ньыгыл Россия» политическай партия пресс-сэкэрэтээрэ В.Н.Баишева, СР Ил Түмэн депутата С.С.Иванов көмөлөһөөччүтэ И.И.Харлампьев СР Аҕа баһылыгын быыбарыгар Е.А.Борисовка Уус-Алдан улууһа баһыйар куолаһы биэрэн, инники сайдыыга аан аһыллыбытын, баараҕай кыахтар бэриллибиттэрин бэлиэтээн, улуус баһылыгар, «Биир ньыгыл Россия» олохтоох салаатыгар, быыбары ыытыыга көхтөөхтүк кыттыбыт бар дьоөөо махтанан тыл эттилэр, наҕараадалары туттардылар. үрдүк наҕарааданан - СР Правительствотын Бочуотунай грамотатынан улуус баһылыгын солбуйааччы Г.А.Васильев, улуус баһылыгын махтал суругунан «Биир ньыгыл Россия» Саха сиринээҕи салаатын пресс-сэкэрэтээрэ В.Н.Баишева, Ил Түмэн депутатын көмөлөһөөччүтэ И.И.Харлампьев, СР Аҕаларын лигата общественнай хамсааһын председателэ А.И.Габышев, «Биир ньыгыл Россия» Саха сиринээҕи салаатын исполкомун сэкэрэтээрэ Д.Е.Глушко махтал суругунан Уус-Алданнааҕы политсэбиэт сэкэрэтээрэ, улуус баһылыга А.В. Федотов уонна улуустааҕы исполком салайааччыта С.Г.Данилова бэлиэтэннилэр.

Тэрээһин «Уйгу сирэ – Уус-Алдан» гимнин сүһүөххэ туран толоруунан түмүктэннэ.