Саха сиригэр норуот фронун бүтүн Россиятааҕы ситэриилээх кэмитиэтин салайааччыта Валерий Лютай Өймөкөөн улууһун баһылыга Михаил Захаров «Toyota Prado» массыына оннугар "УАЗ-Патриот" массыынаны атыылаһарыгар этии киллэрдэ. Маныаха майгынныырдык кини Конституционнай суут бэрэссэдээтэлин Александр Ким-Кимэни кытта кэпсэтэр санаалаах.

«Норуот фрона «Чиэһинэй атыылаһыы иһин» диэн акцияны сотору-сотору ыытар. Дойду бүттүүнэ ыарахан кэмҥэ ыктаран турдаҕына, государство суотугар 3-5 мөл.солк. суумалаах массыынаны атыылаһаллара сөбө суох. Маннык быһыыны-майгыны кыраҕытык кэтээн көрүөхпүтүн наада. Курбутун ыга тардынарбытыгар тиийэбит», - диэтэ Валерий Лютай.

Дьон үксэ маннык быһыыны-майгыны сэмэлиирин эрэ кини бэлиэтиир. «Биһиги хонтуруолуур уорган буолбатахпыт. Онон, салайааччылар государство үбүн-харчытын кэмчилииллэрин туһунан тылбытыгар киллэриэхпитин эрэ сөп», - диэтэ кини.

Валерий Лютай уонна уопсастыбаннай тэрилтэлэр бэрэстэбиитэллэрэ Москваҕа баар куратордары кытта ыкса ситимнээхтик үлэлииллэр. «Күһэйэн да туран атыы тохтотуллуон сөп», - диир Лютай.