Кэнники кэмҥэ массыына ыытарга үөрэтэр оскуолалар ахсааннара элбээбитэ. Ону тэҥэ быраабы атыылаһан ылыы түгэннэрэ тахсаллара. Бу оскуолалар буоллун-хааллын диэн үөрэтэллэрин түмүгэр, курсаннар ситэ үөрэммэккэ тахсаллара.
Алтынньы ыйдааҕы туругунан, Россия үрдүнэн 11 тыһыынча оскуолаттан 302-тэ эрэ лицензия ылбыт. Холобур, Башкирияҕа 214 оскуолаттан 8-һа эрэ аттестацияны ааспыт диэн Ufa.ru сайт суруйар. 
Сэтинньигэ Дьокуускай куоракка 15 оскуола баарыттан 4 эрэ авто-оскуола лицензия ылла: “Север-авто”, “ДОСААФ”, “Фаворит” уонна 1-кы №-дээх авто-оскуола. Бу уруккуттан үлэлиир уонна cаҥа ирдэбилгэ эппиэттиир 0,24 га иэннээх автодромнаах, анал үөрэтэр тренажердаах тэрилтэлэр. Маны тэҥэ өрөспүүбүлүкэ үрдүнэн 5 эрэ оскуола: “Профи” (Горнай), “МРТК в Мирном” (Мирнэй), “Вилюйский техникум” (Бүлүү), “Вилюйская техническая школа ДОСААФ” (Бүлүү), “Технезис плюс” (Нерюнгри) аттестацияны ааста. 
Бу авто-оскуолалар саҥа программанан үлэлээн эрэллэр. Үөрэнии болдьоҕо 2 ыйга диэри уһаан, 138 чаас буолла (урут 106 чаас этэ), манна уйулҕаны үөрэтии, быһылаан кэмигэр бастакы көмөнү оҥоруу, о.д.а. саҥа предметтэр киирдилэр. Мантан сиэттэрэн, үөрэнии төлөбүрэ эмиэ үрдээтэ. Холобур, “Север-авто” уонна “Фаворит” оскуолаларга 30 тыһ. солк. тэҥнэстэ (урут 15-16 тыһ. солк. этэ). Ол эрэн, хас да түһүмэхтээн төлүүрү көҥүллүүллэр. “Фаворикка” “5 доҕоргун аҕал, аҥарын төлөө” диэн акциялаахтар. 
“Билигин саҥа  программанан үөрэтэбит эрээри, үс ый устата уруккунан экзамен тутабыт. Кыһын үөрэниэн баҕалаах уруккуттан да аҕыйах буолааччы, ол сиэринэн курсант ахсаана олус эбиллэ илик”, -- диэн “Север-авто” оскуолаҕа эттилэр. 
Лицензия ылбатах оскуолалар сабыллар туруктаахтар, оччотугар, төһө да төлөбүрэ үрдээтэр, сааһыары курсант ахсаана элбиирэ күүтүллэр.