Сахарнай диабетынан ыалдьар оҕолоох төрөппүттэр ааттарыттан Любовь Попова уонна Альбина Пермякова инсулинынан эрэ сылдьар оҕолорго туруоруллар помпаҕа туттуллар матырыйаалы ыларга республика көмөлөһөрүгэр көрдөстүлэр. Кинилэр ый аайы бу матырыйаалга 6600 солк. барыыллар эбит. Помпа бэйэтин сыаната -- 100 тыһ. солк.

Доруобуйа харыстабылын министрин бастакы солбуйааччы Олег Припузов иһитиннэрбитинэн, республикаҕа 130-н тахса сахарнай диабетынан ыалдьар оҕо баар, онтон 30-ча оҕо помпалаах, ол эбэтэр күннэтэ инсулины помпа нөҥүө ыла сылдьар. Помпаҕа туттуллар матырыйаалга сылга 1 мөл. 800 тыһ. солк. ирдэнэрин туһунан кэпсээтэ. Михаил Николаев бу үбү булан, маннык ыарыынан ыалдьар оҕолордоох төрөппүттэргэ 2015 сылтан көмөлөһөрүгэр сорудахтаата.

Дьокуускай куорат Марха микро-оройуонун олохтоохторо, кыра дохуоттаах ыаллар Григорьевтар уһанар сыах арыйалларыгар социальнай хантараахха олоҕурбут көмөнү ылыахтарын баҕаралларын туһунан кэпсээтилэр. Бу боппуруоһу быһаарарга улахан харгыс суоҕун туһунан Дьокуускай куорат нэһилиэнньэтин социальнай көмүскэлгэ управлениетын салайаачы Семен Матвеев эттэ. “Бу нэдиэлэҕэ тустаах хамыыһыйа ханнык ыалга көмөлөһөрү быһаарыаҕа. Григорьевтар сайабылыанньалара уонна бизнес-былааннара киирэ сытар. Ол эрээри, түөрт хантараахха эрэ тиийэр үп баарын туһунан бэлиэтиэм этэ”, -- диэн иһитиннэрдэ.

Мэҥэ-Хаҥалас Даркылаах нэһилиэгин олохтооҕо, үлэ бэтэрээнэ Василий Дьячковскай нэһилиэк кииниттэн 13 км. тэйиччи сайылыкка бааһынай хаһаайыстыбатын базатын тэриммитин туһунан кэпсээтэ. Төһө да күнүнэн иитиллэр электростанция туруорбуттарын иһин, станция кыамтата мөлтөх буолан, хаһаайыстыбаларыгар көмөтө кыра. Кини республика салалтатыттан киин сиртэн ыраах сытар кыра хаһаайыстыбаларга арыый күүстээх кыамталаах станцияны туруоруу боппуруоһун быһааралларын туһунан көрдөстө. Маныаха Михаил Николаев тустаах министерстволарга уонна ведомстволаргы “Агенства новых технологий” тэрилтэ иһинэн бу боппуруоһу быһаарар тиһиги толкуйдуулларыгар сорудахтаата. Саҥаны киллэрии пилотнай былаһааккатынан Василий Петрович сайылыга буоларын туһунан эттэ.

Бу күн өссө да кэккэ боппуруостары ырыттылар, көрдүлэр, быһаардылар.