РФ үөрэхтээһиҥҥэ уонна наукаҕа министиэристибэтэ бу сыл атырдьах ыйыгар орто профессиональнай үөрэхтээһин испииһэгэр уларытыылар киирбиттэрэ уонна устудьуон ахсаана аҕыйаҕынан 97 идэҕэ үөрэтии тохтотулларын туһунан быһаарбыттара. Өрөспүүбүлүкэ депутаттара бу боппуруоска ылсан, көдьүүстээхтик үлэлээбиттэрин түмүгэр сөптөөх дьаһал ылыллыбыта.

Аллараа Халыма хоту норуттар арктикатааҕы колледжатарын дириэктэрэ Елена Антипина аан бастакынан бу быһаарыыны утарбыта. Кини Ил Түмэн бэрэссэдээтэлэ Александр Жирковка уонна парламент хоту сиргэ олохтоох аҕыйах ахсааннаах норуоттар уонна Арктика дьыалаларынан дьарыктанар сис кэмитиэт бэрэссэдээтэлэ Елена Голомареваҕа хоту сиргэ тутаах суолталаах табаһыт идэтин орто үөрэх испээһэгиттэн таһаарбаты туруорсубута.  Елена Антипина Ил Түмэн пресс-сулууспатыгар иһитиннэрбитинэн, быйылгы үөрэх дьылыгар табаһыт идэтигэр уопсайа 24 устудьуон, ол иһигэр 12 устудьуон «механизатор-табаһыт» идэҕэ 2,5 сыл устата үөрэнэллэр. Үөрэхтэрин бүтэрбиттэр орто профессиональнай үөрэҕи ылаллар. «Үһүс разрядтаах табаһыт» идэҕэ 12 устудьуон алта ый болдьоххо үөрэнэр.

Саха сирин парламенын бэрэссэдээтэлэ  Александр Жирков  сорудаҕынан Елена Голомарёва Ил Түмэн сис кэмитиэтин аатыттан РФ үөрэххэ уонна наукаҕа министригэр Дмитрий Ливановка «механизатор-табаһыт» идэни орто үөрэх испииһэгэр хаалларар туһунан көрдөспүтэ. «Хомойуох иһин, ыччат табаһыт идэтигэр сыстыбат. Итиниэхэ хамнас дуона суоҕа, үлэлиир усулобуйа уустуга сүрүн төрүөтүнэн буолар. Табаһыт идэтигэр үөрэниэн баҕалаах эдэр дьон ахсаана аҕыйыы турар. Ол эрээри, бу идэни орто үөрэхтээһин испииһэгиттэн таһаардахха, табаны иитиигэ быһыы-майгы өссө уустугурар.

Табаһыт идэтин туоһулуур диплому ылбыт эдэр дьон сыл аайы табаһыттар кэккэлэрин хаҥаталлар уонна таба ыстаадаларыгар үлэлии бараллар», - диэн Елена Голомарёва суругар ыйыллар.

Елена Христофоровна Госдума депутатын, Хоту сир, Сибиир уонна Уһук Илин аҕыйах ахсааннаах төрүт омуктарын ассоциациятын президенин Григорий Ледковы, «Оленеводы мира» ассоциация бырабылыанньатын бэрэссэдээтэлэ  Михаил Погодаевы бу судургута суох кыһалҕаны баһыырыыга кытыннарбыта. Кинилэр уонна Саха сирин баһылыга Егор Борисов РФ үөрэххэ уонна наукаҕа министрэДмитрий Ливановкабу боппуруоһу сытыытык туруорбуттара.

Ити туруорсуу түмүгэр орто үөрэх 97 идэтин, ол иһигэр «механизатор-табаһыт» идэни тохтотууну хаттаан көрөр туһунан быһаарбыттар. Норуот депутата Елена Голомарёва  федеральнай министргэ Дмитрий Ливановка, РФ Үөрэххэ уонна наукаҕа министиэристибэтин отделын начальнигар Саргылаана Брызгаловаҕа хоту сиргэ олохтоох аҕыйах ахсааннаах омуктар кыһалҕаларыттан туора турбатахтарыгар улахан махталын тиэрдэр.

Итини таһынан парикмахер, метрополитен слесарь-электрига, фотограф, тырааныспар терминалын оператора, алмааһы кырыылааччы, о.д.а. идэлэрин хаалларар туһунан быһаарбыттар. Ити туһунан Ил Түмэн пресс-сулууспата иһитиннэрэр.