«Кыайыы 50 сыла» Спорт дыбарыаһыгар тохсунньу 23 күнүгэр Таатта, Кэбээйи, Амма уонна Үөһээ Дьааҥы улуустарын баһылыктара уонна Спорт министиэристибэтэ ити үлэни сүрүннүүргэ сөбүлэһиини түһэрсибиттэрэ.

2014 сыл кулун тутарыгар «Готов к Труду и Обороне» Бүтүн Россиятааҕы физкультурнай-спортивнай хамсааһын  Россия 12 регионугар саҕаламмыта. Быйыл ити 12 региоҥҥа 28 регион эбилиннэ, ол иһигэр Саха сирэ.

«Бу комплекс улуустарынан тарҕаннаҕына, дьон физкультуранан уонна спордунан дьарыктаныыта маассабай буолуо», - диэтэ спорт миниистирин солбуйааччы Владимир Агафонов.

ГТО нуорматын туттарыы 8 киинэ улуустарга аһыллыаҕа. Билигин докумуоннары оҥорон  улуустарга тарҕатыахтара. Чурапчытааҕы физическэй культура, спорт государственнай институт илин эҥэр улуустары түмүөҕэ. ХИФУ физкультура уонна спорт институтугар Дьокуускай куорат уокуруга сыһыарыллар. Ити курдук оройуоннар бэйэлэрэ туспа кииннэниэхтэрэ.