Дьокуускай куорат баһылыгын социальнай боппуруостарга солбуйааччы Евдокия Евсикова омугунан арахсыы, атааннаһыы түмүгэр кыыһы кырбаатылар диэн WhatsApp мессенжерынан тарҕаммыт иһитиннэриини олоҕо суоҕунан ааттаата.

«Билигин оскуолаҕа силиэстийэлиир уорганнар, араас хамыыһыйалар үлэлииллэр. Көннөрү иирсии түмүгэр кыыһы кырбаабыттар, омугунан атааннаһыы  буолбатах.

 Бу оскуолаҕа араас омук 342 оҕото үөрэнэр. Нууччалыы тылынан үөрэтэллэр. Педколлективы ылан көрөр буоллахха, 31 үлэһиттэн 23-һэ - саха, 7 – нуучча, 1 – атын омук бэрэстэбиитэлэ. Оҕолор 55% - нууччалар, 30% – сахалар, 15% – атын омуктар», – диэтэ Евсикова.

Кыыһы кырбааһыҥҥа баар оҕолор кимнээхтэрэ быһаарылынна. 18 оҕо бары 14 саастарын туола иликтэр. Бу араллааҥҥа кыттыбыттары барыларын эппиэккэ тардыахтара. Ол иһигэр төрөппүттэрин эмиэ.

Кырбаабыт кыыһы сокуоннай саастарын ситэ илик оҕолору быстах кэмҥэ тутар кииҥҥэ икки сууккаҕа киллэрбиттэр. Буруйдаах кыыһы манна өссө өр тутарга суут быһаарыан сөп эбэтэр накаастабыл атын миэрэтин ылыаҕа. Сокуоннай саастарын ситэ илик оҕолор дьыалаларынан дьарыктанар хамыыһыйа кыыһы анал оскуолаҕа ыытарга этии киллэриэҕэ. Оттон маннык оскуола Саха сиригэр суоҕун, барытын суут быһаарыаҕын туһунан Е.Евсикова бэлиэтээн эттэ.

Кырбаммыт кыыс Медицина национальнай киинигэр эмтэнэр.

Евдокия Евсикова уонна Алексей Петров эппиттэринэн, быһылаан кэнниттэн оскуолаларга барыларыгар, дьиэ кэргэҥҥэ  сиэр-майгы боппуруоһун сытыытык туруоруохтара.