Уһук Илиҥҥи региоҥҥа РФ президенин боломуочуйалаах бэрэстэбиитэлэ – РФ бырабыыталыстыбатын бэрэссэдээтэлин солбуйааччы Юрий Трутнев эппитинэн, 2014 сылга салгын тырааныспарынан айаннааһыны субсидиялааһын чэрчитинэн уопсайа 3,4 млрд солк.көрүллүбүт. Бу бырагырааманан 450 тыһыынча киһи туһаммыт.

2015 сылга региоҥҥа федеральнай бюджеттан 4,1 млрд солк. көрүллүбүт. Итинтэн 1,3 млрд солкуобайга регионнар икки ардыларынааҕы 15 хайысха субсидияламмыт.

Россия тырааныспарга миниистирин солбуйааччы дакылаатыгар эппитинэн, итиниэхэ өссө 9 маршрут эбиллэр. Бу хайысхаларынан 18-гар диэри саастаах оҕолору «Океан» (Приморье) Бүтүн Россиятааҕы оҕо киинигэр сылы эргиччи таһыахтара.

Саха сирин баһылыга Егор Борисов уонна Хабаровскай кыраай губернатора Вячеслав Шпорт дьон саамай элбэхтэ сылдьар сирин субсидияланар хайысхалар испииһэктэригэр киллэрэр  туһунан этиилээхтэр.

Вице-премьер Юрий Трутнев Уһук Илиҥҥи региону сайыннарыы министиэристибэтэ бу субъектары кытта испииһэги ырыталларыгар уонна дьон наадыйыытын аахсан туран көннөрүүлэри, чуолкайдааһыннары киллэрэрэллэригэр сорудахтаата. Кини дьон баҕата инники күөҥҥэ тутуллуохтааҕын ыйда.