Доруобуйа харыстабылын уларытан оҥоруу чэрчитинэн «РФ-ҕа гражданнар доруобуйаларын харыстабылын туһунан» федеральнай сокуоҥҥа уларыйыылар киирбиттэрэ. Ити уларыйыы быһыытынан 2012 сыл тохсунньу 1 күнүттэн ыла бастакы медицинскэй-санитарнай көмөнү амбулаторнай уонна күнүскү стационар усулуобуйаларыгар оҥорор буолбуттара. Ол эбэтэр, учаастактааҕы балыыһаларга баар стационардар сабыллыахтаахтара, дьон үлэтиттэн тохтотуллуохтааҕа.

Россия атын регионнарыттан Саха сирэ уратылааҕын, ыарахан усулуобуйалааҕын учуоттаан өрөспүүбүлүкэ бырабыыталыстыбата түннэри-күнүстэри үлэлиир учаастактааҕы балыыһалары саппат туһунан быһаарыыны ылыммыта. Итиниэхэ государственнай бюджеттан 2 млрд. кэриҥэ солк. көрүллэрэ.

СИА-ҕа эрдэ суруйбут интервьюбутугар  миниистири солбуйааччы Людмила Вербицкая федеральнай сокуоннарга ханнык да уларытыылар, көннөрүүлэр киирбиттэрин иһин, учаастактааҕы балыыһалары оннуларынан хаалларыахпыт диэбитэ.

Билигин быһыы-майгы уларыйда диэххэ наада. 2015 сылга диэри ити учаастактааҕы балыыһалар хаалаллар, ол эрээри бу тэрилтэлэри үбүлээһин 700 мөл.солкуобайынан .кыччыыр. «Баҕар, балыыһаларга куойка ахсаанын аҕыйатыахпыт. Түүннэри-күнүстэри суукканы эргиччи үлэлиир стационардары уруккунан хаалларабыт, үлэһиттэр штаттарын эмиэ», - диэтэ Припузов  уонна ити дьаһал олоххо киирдэҕинэ, биир куойка миэстэ көдьүүстээх буолуоҕун кини эбэн эттэ.