Уларыйыы чэрчитинэн экономика, социальнай эйгэ салгыы сайдалларын хааччыйарга анаммыт инники күөҥҥэ тутуллар былааннары олоххо киллэрэр туһугар атын ороскуоту биллэ аччатыахтара. Холобур, өрөспүүбүлүкэ баһылыгын уонна бырабыыталыстыбатын дьаһалтатын үлэтин тэрийиигэ бюджеттан бэриллэр үп-харчы кээмэйэ быһа холуйан 16 мөл. солк. кыччыыр.

Сокуону быһаарар сурукка этиллэринэн, 2015 сылга Саха сиригэр экономика уонна социальнай эйгэ бигэ сайдыыларын хааччыйарга, маныаха анаммыт былааны олоххо киллэриигэ анаан бу бырайыагы бэлэмнээбиттэр.

Өрөспүүбүлүкэтээҕи бырагыраамалыры үбүлээһин кээмэйэ кыччыырын таһынан, бырагыраама таһынааҕы ороскуоту намтатыахтара. Ол курдук, Государственнай Мунньах (Ил Түмэн) 13, 65 мөл.солк. кэмчилииргэ бэлэм.

Норуот депутаттара сокуоҥҥа уларытыыны киллэриини ылыннахтарына, өрөспүүбүлүкэ баһылыгын уонна бырабыыталыстыбатын дьаһалтатын үлэтин хааччыйыыга анаан  бюджеттан оҥоһуллар үбүлээһин 15,93 мөл.солк. кыччыаҕа. Кылаабынай хонтуруоллуур управление быйыл 1,75 мөл.солк. аҕыйах үбү-харчыны ылыаҕа. Регион Счетнай палаататын үбүлээһин 1,9 мөл.солк., оттон баһылык уонна бырабыыталыстыба дьыалаларын управлениетын үбүлээһин 11,2 мөл.солк. кыччыыр.