Манна Сир үрдүгэр киһи олороругар саамай кутталлаах аҕыс сири эрэдьиэстээбиттэр. Онно бастакынан Саха сирин Верхоянскай куората ааттаммыт. Кини дьон олоҕор суоһуур Индонезия Ява арыытыгар баар Мерапи («Уотунан уһуурар хайа») вулкан, субу-субу штормҥа түбэһэн аҥара муораҕа суураллыбыт, сороҕо халааҥҥа, бадарааҥҥа тимирбит Гонаив куорат, түгэҕэр хаһан баҕарар тоҕо тэбиэн сөптөөх углекислай газ, метан баай саппааһа баар Киву күөл, аҕыйах сылынан бүтүннүү уу анныгар барыан сөп Мальдиви арыы, аан дойдуга ураган киининэн биллибит Улахан Кайман арыы, торнадо ороҕунан ааттаммыт Оклахома-Сити (АХШ), Кытай Миньцинь регионугар сыллата улаатар кумах куйаар иннилэригэр туруоруллубут.

Онно Верхоянскай куорат туһунан маннык диэн суруйбуттар: «Верхоянскай куорат тымныы тайҕа ортотугар, Москваттан илин диэки 4800 км тэйиччи, Сибиир түгэҕэр баар. Манна 1892 сыл олунньутугар саамай намыһах температура – 67,6 кыраадыс тымныы бэлиэтэммитэ. Бу Хотугу эргимтэҕэ баар кырдьаҕас куоракка 1173 киһи олорор. Верхоянскай саамай тымныы куоратынан, «Тымныы полюһунан» аатырыан аатырар. Киһи маны кытта ылбычча мөккүһэр кыаҕа суох: манна балаҕан ыйыттан кулун тутарга диэри күн сууккаҕа биэс чаастан уһуннук көрбөт, оттон кыһынын температура 40 кыраадыс тымныыттан үөһэ тахсыбат».