III-с Бүтүн Россиятааҕы Универсиада Дальневосточнай кэрдииһигэр Тохсунньу 24 күнүгэр Сахалиҥҥа Саха сирин хамаандатын хайыһардьыттара бириистээх миэстэлэрин барытын кэриэтэ ыллылар, диэн SаkhalinMedia ИА корреспондена иһитиннэрэр.

Финальнай сүүрүүгэ кыргыттарга бастакынан Надежда Елисеева (Саха Республиката) кэллэ, иккиһинэн - хабаровчанка Надежда Кузнецова, үсүһүнэн уонна төрдүһүнэн – Саха сирин хайыһардьыттара Бунавша Табарова уонна Варвара Текеянова таҕыстылар.

Уолаттарга бастакы үс миэстэни Саха Республикатын спортсменнара ыллылар: Дмитрий Плосконосов, Александр Филлиппов уонна Андрей Николаев. Сахалин уола Никита Хаян төрдүһүнэн кэллэ.

Призердары сибэккилэринэн чиэстээтилэр, оттон сүрүн бириистэр тохсунньу 26 күнүгэр эр дьоҥҥо уонна дьахталларга 10 уонна 5 км көҥүл стилинэн түмүк сүүрүүлэр кэннилэриттэн туттарыахтара. Кыайыылаах хамаанда кулун тутар саҥатыгар Ижевскэйгэ кыһыҥҥы Универсиад түмүк кэрдииһигэр барыаҕа.

Санатан эттэххэ, тохсунньу 23 күнүгэр Южно-Сахалинскайга хайыһарга Бүтүн Россиятааҕы III-с кыһыҥҥы Универсиада Дальнай Востоктааҕы кэрдииһэ саҕаламмыта. хайыһар суолугар Амур, Сахалин уобуластарын, Камчатскай, Хабаровскай кыраайдар, Саха Республикатын спортсменнара таҕыстылар, олор истэригэр алта спорт маастардара бааллар.

Аһыллыы сиэрин-туомун кэнниттэн тута дьахталларга 5 километргэ классическай стилинэн сүүрүү саҕаламмыта. Бастыҥ бириэмэни Хабаровскай кыраайтан спорт маастара Надежда Кузнецова көрдөрдө (16.18,9).

Үрүҥ көмүс призерынан Саха Республикатыттан спорт маастара Надежда Елисеева буолла. Кини бириэмэтэ 16.52,2. Үһүскэ – Лариса Тырышкина(16.57,8) таҕыста.

Эр дьоҥҥо саамай түргэнник Саха Республикатыттан спорт маастара Дмитрий Плосконосов кэллэ. Кини дистанцияны 26 мүнүүтэ 31 сөкүүндэнэн сүүрдэ. Сахалин арыы олохтоохторун иккис миэстэҕэ тахсан спорт маастара Никита Хаян үөртэ (27.26,8). Боруонса мэтээли Саха Республикатыттан спорт маастара Александр Филиппов ылла (27.38,4).