Егор Борисов Саха сирэ климатическай да, географическай да уратытынан улахан ороскуоттаах регионнар ахсааннарыгар киирэрин санатта. Бюджеттары тэҥниир дотацияны үллэрии методиката өрөспүүбүлүкэ уратытын учуоттаабатын чиҥэтэн ыйда. Ону таһынан бу методика хамнаска дьиҥнээх наадыйыыны уонна ороскуоту ааҕыыта регион туһатыгар буолбатах. Өрөспүүбүлүкэҕэ нуорма-быраап аакталарынан үөскэтиллибит оройуон коэффициена аахсыллыбат.

Егор Борисов эппитинэн, 2015 уонна 2016-2017 сыллаардааҕы федеральнай бюджекка дотация сылын аайы аччаан иһэр уонна нолуоктан киирэр дохуотунан сабыллыбат. Дойду президенэ Владимир Путин ыам ыйынааҕы ыйаахтарыгар ыйыллыбыт өрүттэргэ: хамнаһы үрдэтиини, эргэ дьиэлэртэн дьону көһөрүүнү, оҕо садтарыгар уочараты суох оҥорууну олоххо киллэрии эбии ороскуоту эрэйэр. Итинтэн тирэҕирэн Егор Борисов 2015-2017 с.с. бюджет тэҥ буолуутун хааччыйыыга дотация кээмэйин улаатыннарары, онно баар мехнизманарга уларытыылары киллэрэргэ туһуламмыт Саха сирин бырабыыталыстыбатын этиитин учуоттууру турууласта.

Дмитрий Медведев  РФ үпкэ миниистирэ  Антон Силуанов бу боппуруоска быһаарсарыгар, Саха сиригэр көрүллэр дотация методиката төһө сөптөөхтүк оҥоһуллубутун ырытарыгар сорудахтаата.

РФ тырааныспарга министиэристибэтэ уонна суол федеральнай агентствота Өлүөнэ өрүһү туоруур муостаны бырайыактыыры уонна тутууну сүрүннүүр концессионнай сөбүлэһиини 2014 сылга түһэрсэллэригэр РФ бырабыыталыстыбатын бэрэссэдээтэлэ сорудахтыырыгар Егор Борисов эттэ. Өрөспүүбүлүкэ өттүттэн маныаха ирдэниллэр үлэ тилэри оҥоһуллубутун ыйда.

Бу боппуруоһу ымпыктаан-чымпыктаан ырытан баран Дмитрий Медведев РФ тырааныспарга миниистирэ Максим Соколов  уонна экономическай сайдыы миниистирэ Алексей Улюкаев ааттарыгар резолюцияны аадырыстаата.

Егор Борисов дойду премьер-миниистирин болҕомтотун «Уһук Илин уонна Байкал регионнарын социальнай-экономическай туруктарын 2018 сылга диэри сайыннарыы» тус сыаллаах федеральнай саҥа быраараама бырайыагар Саха сиригэр ураты улахан суолталаах инфраструктурнай эбийиэктэри киллэрэри туруоруста. Ити эбийиэктэр (урукку өттүгэр 2013 сылга диэри болдьохтоох бырагыраамаҕа киирэн үбүлэммит) - Кыһыл-Сыыр 84 км магистральнай газопровод, «Амма» регионнааҕы суол, Мииринэй-Сунтаар-Ньурба ВЛ220 кВ (3-с уонна 4-с комплекстар) электричество чэрчитин тардыы, Зырянкаҕа дьоҕус ТЭЦ. РФ бырабыыталыстыбатын бэрэссэдээтэлэ ити эбийиэктэр бэлэмнэригэр сөбүлэстэ уонна суһаллык тиһэҕэр диэри тиэрдиллиэхтээхтэрин бэлиэтээн эттэ. РФ Уһук Илини сайыннарыы миниистирэ Александр Галушка уонна экономическай сайдыы миниистирэ Алексей Улюкаев маныаха тустаах этиилэри бэлэмнииллэригэр сорудахтаата.

Егор Борисов бүтүн аан дойдутааҕы баан биэрэр үбүнэн-харчытынан «Саха Өрөспүүбүлүкэтигэр оскуола иннинээҕи үөрэхтээһини инновационнай сайыннарыы бырайыагын туһунан Дмитрий Медведевкэ кэпсээтэ. Бу баан үлэһиттэрин кытта кини көрсүбүтүн, бу гуманитарнай хайысхалаах дьаһал буоларынан бобууга хапсыбатын туһунан кинилэр эппиттэрин Егор Борисов бэлиэтээтэ. Ол эрээри, баан дириэктэрдэрин сэбиэтэ күн бүүҥҥэ диэри бүтэһиктээх быһаарыыны ыла илигин кини ыйда. Онон , иэһи биэрии хаһана чопчу биллибэт кэмҥэ тардыллыбыт.

Дмитрий Медведев РФ вице-премьерыгар Ольга Голодецка уонна экономическай сайдыы миниистирэ Алексей Улюкаевка федеральнай бюджет үбүн-харчытын туһанан оҕо садтарыгар уочарат кыһалҕатын суох оҥорууну ситиһэри суругунан сорудахатаата.

Саха сирин дизельнай энергиэтикэтин перекрестнай субсидиялааһыны суох оҥорууга үөскээбит кыһалҕалары туоратыы тула Дмитрий Медведев уонна Егор Борисов кэпсэттилэр. Бу кыһалҕаны баһаарыыга экономическай сайдыы, энегриэтикэ министиэристибэлэрин уонна тарыып федеральнай сулууспатын быһаарыылара оҥоһуллубуттар эрээри, кыһалҕа быһаарыллыбакка турарын Е.Борисов эттэ.

Онон Саха сирин баһылыга баар хос бырагыраамалар чэрчилэринэн ороскуоту толуйууга субсидияны туруоруста. Субсидияны биэриигэ этиилэри РФ бырабыыталыстыбатын вице-премьерэ Аркадий Дворкович бэлэмнииригэр сорудахтаата.

Кэпсэтии түмүгэр кыһалҕалар, ыарахаттар баалларын да үрдүнэн өрөспүүбүлүкэ ситиһиитин бигэтитэригэр уонна оннунан хаалларарыгар эҥкилэ суох эрэнэрин Дмитрий Медведев эттэ.

РФ бырабыыталыстыбатын официальнай саайтыттан хаартыска.