Республика баһылыгын эбээһинэһин толорооччу  Егор Борисов куоластааһыҥҥа хас да кандидатура туруохтааҕын эттэ. Партия чилиэннэриттэн ким эрэ кинини кытта праймеризка күрэстэһэрин мунньахха сылдьыбыт дьон улаханнык саарбахтаатылар. Е.Борисов эппитинэн, партия иһигэр куоластааһын аһаҕас уонна дьэҥкэ буолуохтаах «Регион үрдүкү дуоһунаһыгар кандидатураны политическай партиялар киллэрэллэр диэн РФ сокуонугар ыйыллар.

«Биир ньыгыл Россия» партия устаабыгар праймериз ыытыллыытын механизма чуолкайдык уонна чопчутук суруллар. Ити нуормалар булгуччу тутуһуллуохтаахтар. Оччотугар эрэ куоластааһын чиэһинэйдик барбытыгар саарбахтааһын үөскүө суоҕа. Республикаҕа бүгүн көхтөөх гражданскай уопсастыба үөскүүр, дьон-сэргэ былаас уорганыгар эрэниитэ улаатан иһэр. Онон дьон эрэниитин, итэҕэлин толоруох тустаахпыт. Быыбар күрэстэһээччилээх барыаҕа», - диэтэ кини.

Көрдөрөр-иһитиннэрэр тиһиктэргэ болдьоҕу иннинэ быыбар туһунан кэлиҥҥи нэдиэлэҕэ элбэх сурулларын, этиллэрин Егор Борисов таарыйда. Кини Россия политическай систиэмэтигэр киирэрэ уларыйыылар дойду субъектарыгар элбэх боломуочуйаны биэрэллэрин, ону таһынан регионнар баһылыктарын быыбардааһын сокуонунан бигэргэммитин республика баһылыгын э.т. эттэ. «Федеральнай да, республикатааҕы да сокуоннар чэрчилэринэн болдьоҕу иннинэ быыбары ыытар туһунан быһаарыы ылыллыбыта. Ону таһынан правительство отчуотун кэмигэр да, күн бүгүҥҥэ диэри Саха сирэ бүтүннүүтэ бэйэтэ баһылыгы талыахтааҕын дьон-сэргэ этэр, туруорсар. Норуот субъект баһылыгын талар эппиэтинэһи бэйэтигэр ылынар баҕатын, этиитин биһиги ытыктыахтаахпыт. Онон быыбары болдьоҕу иннинэ ыытабыт», - диэтэ Егор Борисов.

Муус устар 24 күнүгэр Владимир Путин Егор Борисов боломуочуйатын кэмин иннинэ тохтотор туһунан ыйаахха илии баттаабыта. Бу ыйаахха ыйыллыбытынан, кини Саха сирин баһылыгын эбээһинэһин быстах кэмэ толорооччунан анаммыта.