«Биһиги аҕа көлүөнэ дьон Саха сиригэр болдьоҕу иннинэ президент дуоһунаһгар быыбар ыытылларын туһунан истэммит, президент Егор Борисов кандидатуратын киллэрэбит», - диэтэ сэбиэт бэрэссэдээтэлэ, үлэ бэтэрээнэ  Анатолий Васильев. 

«Триумф» спорт комплексыгар Нам улууһун олохтоохторун көрсүһүүтүгэр аҕа саастаах дьон бу этиилэрин иһитиннэрдилэр. Манна буолбут аһымал кэнсиэртэн киирбит үп-харчы Саха сирин норуоттарын VI-с спортивнай оонньууларын тэрийиигэ бэриллиэҕэ.  

«Биһиги Егор Афанасьевич Борисовы улахан уопуттаах, республика сайдыытыгар сүдү кылааты киллэрбит киһи быһыытынан билэбит. Былырыын халаан иэдээнигэр түбэспиппитигэр көмөтүн иһин махталбыт муҥура суох. Кини эппит тылыгар турар, ол иһини кинини дириҥник ытыктыыбыт. Бу көҕүлээһини республика олохтоохторо өйүүллэригэр бүк эрэнэбит», - диэн эбэн эттэ Анатолий Васильев. 

Билигиҥҥи президент боломуочуйата дьиҥэр, 2015 сылга бүтүөхтээх. Федеральнай көрдөрөр-иһитиннэрэр тиһиктэргэ сорох субъектарга, ол иһигэр Саха сиригэр эмиэ, бу күһүн болдьоҕу иннинэ быыбар ыытыллыахтааҕын туһунан иһитиннэрии тарҕанна. Ити иһитиннэриилэр биир үксүн Кремльгэ сигэнэллэр. . «Республика баһылыгын билиҥҥи рейтинэ 60% аһарар. Нэһилиэнньэни кытта көрсүһүүгэ кини салгыы президент дуоһунаһыгар талылларыгар этии киирэр. Президент: «Токуйдуом» - диэн эппитин, президент дьаьалтатыттан СИА-ҕа тиэртилэр.