Кини этэринэн, Саха сирин бас билиитин сыаната үрдээһинэ Алдан оройуонун хайыһар базата уонна Дьокуускайдааҕы кардиокиин государство бас билиитигэр киирбиттэриттэн буолла.

Ону таһынан Местников 2013 сылга регион бюджетыгар 3,6 млрд солкуобайтан тахса нолуогу таһынан үп киллэрилиннэ диэтэ. Өссө 3,3 млрд солкуобай республика бас билиитигэр баар хаһаайыстыбаннай эбийиэктэр акцияларын атыылааһынтан киирбит үп госбюджет дефицитын сабыыга ыытылынна.

Билиҥҥи кэмҥэ министерство РФ сэбилэниилээх күүстэрин министерствотын бас билиитигэр сылдьыбыт баайы үллэрии туһунан боппуруоһу дьүүллэһэ сылдьар.

"Тикси-3 урукку байыаннай бөһүөлэк олоччу республика бас билиитигэр бэрилиннэ, олорор дьиэлэр муниципальнай бас билиигэ босхо киирдилэр, коммунальнай хаһаайыстыба " СР ОДЬКХ" ГУТ-ҕэ, Дьокуускайга баар байыаннай госпиталь 2 №-дээх республикатааҕы балыыһаҕа сыһыарылыннылар. Итини таһынан Дьокуускай иэнигэр 60 га иэннээх икки улахан сир учаастактара бааллар. Итини туһаныыны билигин республика правительствотыгар быһаара сылдьаллар. Итилэр баҕар үс уонна онтон элбэх оҕолоох ыалларга бэриллиэхтэрэ эбэтэр аукцион быһыытынан кэлим тутууга анаан тутуу тэрилтэлэригэр бэриллиэхтэрэ", - диэтэ бас билии уонна сир сыһыаннаһыыларыгар миниистири солбуйааччы.