Россияҕа Литература, Саха Республикатыгар Предпринимательство, улууска Олоҥхо сылларын аһыы үөрүүлээх чааһа „Айылгы“ Культура уонна духуобунай сайдыы киинигэр буолла. Фойеҕа кэскиллэрбит—эдэр ыччаппыт кэлбит ыалдьыттарга, бырааһынньыкка мустубуттарга анаан үҥкүүлээбиттэрэ, Чурапчы суруйааччыларын айымньыларыттан аахпыттара сүргэбитин көтөхтө.

Сценаҕа бу үс улахан бэлиэ суолталаах сылы кэрэһилиир эмблемэлэр ыйаммыттар. Кырачааннарбыт сценаҕа дьоһуннаахтык туттан олорон „Дьырыбына Дьырылыатта-Кыыс бухатыыр“ олоҥхоттон толорбуттарын саалаҕа мустубуттар олус астына, сөҕө-махтайа көрдүлэр, дохсун ытыс тыаһынан доҕуһуоллаатылар. Кырдьык даҕаны, олус уһун кэрчиктэри биирдэ да иҥнибэккэ, доргуччу, тыла-өһө иһиллэр, өйдөнөр гына аахтылар. Оҕолору кыра саастарыттан фольклорга, уус-уран ааҕыыларга кытыннардахха сахабыт тылын сүмэтин, норуоппут культуратын билэн-көрөн, иҥэринэн тахсыахтара турдаҕа.

Бэлиэ суолталаах сылы арыйыыга аналлаах дакылааты улуус баһылыга А.Т. Ноговицын оҥордо. Кини Россияҕа Литература сыла биллэриллибитэ билиҥҥи кризис бүрүүкээбит кэмигэр Россия дьонун-сэргэтин өйө-санаата, духуобунай сайдыыта бигэ туруктаах буолуутугар, патриотическай тыыҥҥа иитиигэ улахан оруоллаах буоларын, оттон республикаҕа Предпринимательство сыла социальнай-экономическай сайдыыбытыгар, бэйэ бордууксуйатын оҥорууга, предпринимательство бары салааларын күүскэ сайыннарыыга, улууска Олоҥхо сыла ыытыллара төрүт - культурабытын сайыннарыыга, быйыл ыытыллыахтаах Олоҥхо ыһыаҕар туһуланалларын бэлиэтээтэ. Ааспыт сыллааҕы сүрүн үлэлэри, ситиһиилэри кэпсээтэ, быйылгы соруктарбытын билиһиннэрдэ.

Сценаҕа ытыс тыаһынан доҕуһуолланан үөрүүлээх дьаһалга ыҥырыллан кэлбит суруйааччыларбыт С.А. Попов-Тумат, П.П. Федоров-Сомоҕо, А.С. Константинова-Дархаана, А.А. Борисова, В.Г. Слепцова-Санаа, А.М. Дорофеев-Улдьаа Харалы, олоҥхоһуттар Н.П. Тарасов, Н.Н. Григорьев, А.А. Захаров, С.В. Лазарева, бастыҥ предпринимателлэр Е.Е. Адамов, И.С. Никифорова, И.Н. Новгородов, Е.Г. Санжеева, Т.Н. Карсанаева, Д.Д. Яковлев, П.Д. Трофимов, Р.Н., П.П. Архиповтар, А.В., П.М. Старостиннар, Р.Е. Павлова ыҥырыллан тахсаллар. Кинилэргэ барыларыгар улуус дьаһалтатын, улуус сэбиэтин аатыттан сибэкки дьөрбөтө, анал бэлэхтэр туттарылыннылар.

Саха Республикатын спортка уонна физическэй культураҕа миниистирэ М.Д. Гуляев республика Ил Дархана Е.А. Борисов, тус бэйэтин аатыттан бэлиэ күнүнэн эҕэрдэлээтэ. Ил Дархан ыйааҕынан ОДЬКХ профсоюһун республикатааҕы кэмтитиэтин председателэ, ОДЬКХ ГУТ Чурапчытааҕы филиалын салайааччытынан үлэлээбит Е.И. Саввиҥҥа„Гражданскай килбиэн“ бэлиэни туттарда. Махтал суругунан предпринимателлэр Р.Н., П.П. Архиповтар, бочуотунай грамотанан уонна кыһыл көмүс чаһыынан „Кырымах“ бааһынай хаһаайыстыба салайааччыта Н.Н. Лыткин, „Чыакына“ бааһынай хаһаайыстыба слайааччыта Н.Д. Сивцева наҕараадаланнылар.

Республика предпринимательствоҕа уонна туризмы сайыннарыыга миниистири солбуйааччы А.Н. Андросов мустубут дьону эҕэрдэлээн туран, „Хатан“ тэрилтэ салайааччытыгар В.Д. Сивцевкэ, предприниматель Г.М. Васильевка бочуотунай грамоталары туттарда.

Дьоро киэһэ талба талааннаахтар эҕэрдэ нүөмэрдэринэн доҕуһуолланна.