Аҕам саасатаахтар икки бөлөххө арахсан күрэстэстилэр. Бастакы бөлөххө, 800-тэн тахса нэһилиэнньэлээх нэһилиэктэр: Ытык Күөл, Баайаҕа, Дьохсоҕон, Чөркөөх, Харбалаах, Дэбдиргэ, Уус-Таатта киирдилэр, иккискэ: Чычымах, Туора Күөл, Уолба, Чымнаайы, Кыйы уонна Хара-Алдан олохтоохторо киирдилэр. Күрэстэһээччилэр волейболга, эстафетаҕа, сыал ытыытыгар, дуобакка, саахымакка, остуол тенниһигэр, садуобаҕа уонна хабылыкка, хаамыскаҕа илин былдьастылар.

Күрэхтэһиигэ мустубут спортсменнары улуус баһылыгын көмөлөһөөччүтэ Петр Захаров, Таатта нэһилиэгин баһылыга Егор Павлов, улуустааҕы ветераннар сэбиэттэрин председателэ Светлана Беркина, физкультура уонна спорт комитетын начальнига Гаврил Вырдылин, комитет сүрүннүүр специалиһа уонна күрэхтэһии кылаабынай судьуйата Анатолий Мордовской эҕэрдэлээтилэр.

- Спартакиада инникитин да далааһыннаахтык ыытылла туруо. Ветераннарбыт чөл олоҕу, чэгиэн доруобуйаны тутуһалларынан дьоҥҥо-сэргэҕэ, ордук эдэр ыччакка бэйэлэринэн холобур буолаллара үөрдэр, -- диир Гаврил Вырдылин.

Сэргэх күрэхтэһии түмүгүнэн, бастакы бөлөххө Ытык Күөл хамаандата бастаата. Иккис миэстэни Харбалаах хамаандата ылла, үһүс бириистээх миэстэҕэ Дьохсоҕон спортсменнара таҕыстылар. Иккис бөлөхтөргө кыйылар бастаатылар, иккиһи Туора Күөл хамаандата ылла, үһүс бириистээх миэстэҕэ Чымнаайы спортсменнара таҕыстылар.