Инбэлииттэр улуустааҕы уопсастыбалларын бэрэссэдээтэлэ Татьяна Харлампьева тэрийиитинэн бу спартакиада сыллата ыытыллар.

- Быйылгы тэрээһиммитин Улуу Кыайыы 70 сылыгар анаатыбыт. Кыттааччыларбыт ахсаана эбиллэн иһэриттэн үөрэбит, уһук нэһилиэктэртэн уратылар бары кэллилэр, - диэтэ Татьяна Гаврильевна.

Бу күн инбэлииттэр сахалыы остуол оонньууларыгар, дуобакка, саахымакка, дартска, салгын саатынан сыал ытыыга уонна бадминтоҥҥа күрэстэстилэр.

- Манна 40-тан тахса киһи кыттыыны ылла. Инбэлиит дьоҥҥо күрэс былдьаһыыта сүрдээх уустук уонна ыарахан буолар. Бу олохторугар сыал-сорук туруорунан, онно күүскэ дьулуһар, атыттарга холобур буолар кытаанах санаалаах дьон, - диэн санаатын үллэһиннэ күрэхтэһии кылаабынай судьуйата Петр Ефимов.

Билигин инбэлииттэр уопсастыбаларын нөҥүө ыытыллар күрэхтэһиилэр дойдуга, аан дойду таһымыгар олус тиһигин быспакка ыытыллыллар. Хас биирдии киһи доруобай буоларга, этэҥҥэ сылдьарга дьулуһар.