Республика баһылыгын итинник быһаарыныытын СР президенигэр коррупцияны утары Сэбиэт үлэтин кэмигэр Саха сирин Ааҕар палаататын бэрэссэдээтэлин солбуйааччы Ирина Басова этиитин кэнниттэн билиһиннэрдэ.

Кини иһитиннэрбитинэн, 2012-2013 сылларга ыытыллыбыт хонтуруоллуур тэрээһиннэр 12,8 млрд. солкуобай кээмэйдээх государственнай үбү туттууга кэһиилэри булбут. Итинтэн 7,2 млрд. солкуобай сууммалаах кэһиини 2012 сыллаах бюджет харчытын сүрүн тыырааччылар отчуоттарын бэрэбиэркэлээһин түмүгэр булбуттар. Итиннэ үп хайысхата суох - 122,7 мөл. солк., көдьүүһэ суох - 828,4 мөл. солк харчы туттуллубут.

Егор Борисов государство харчытын көдьүүһэ суох туттуу төрүөтэ туохханый диэн ыйытыытыгар Ирина Басова кэһии үгүс өттө буруйу оҥоруу сыалыттан тахсар, ону таһынан нормативнай-правовой базаны билбэттэн, итини таһынан ити база ситэ оҥоһуллубатаҕыттан буолар диэн хардарда.

Ыйытыы мээнэҕэ бэриллибэтэҕэ, республика быһылыга эппитинэн, Сэбиэт государство үбүн хайысхата суох туттуу төрүөтүнэн туох буоларын - коррупционнай дьайыылар, көдьүүһэ суох салайыы эбэтэр көннөрү билбэттэн эбэтэр эппиэтинэһэ суохтан дуу тахсыбытын чопчу быһаарыахтаах.

«Мин ити ыйытыыны анаан биэрдим. Биһиги бүгүн государство харчытын туттуу олус намыһах таһымнааҕын көрөбүт, чопчу ити коррупция түгэннэрэ тахсалларын сүрүн төрүөтэ буолар. Итинтэн сиэттэрэн, республика правительствота үп үлэһиттэригэр уонна бухгалтердарга ирдэбили күүһүрдүөн наада. Ону таһынан государство харчытын тыырыынан дьарыктанар салайааччылар эппиэтинэстэри үрдэтиэххэ», - диэн бэлиэтээтэ президент.