- Мин ийэм Светлана Иннокентьевна Очирова СӨ культуратын туйгуна, Таатта күөрэгэйэ, ырыаһыт. Билигин Ытык Күөлгэ «Сарыал» Культура киинигэр үлэлиир-хамсыыр. Биһиги бииргэ төрөөбүт иккиэбит. Быраатым Иннокентий үлэһит. Ини-биилэр буолан, оҕо эрдэхпититтэн иннэлээх сап курдук сылдьабыт, наһаа тапсабыт. Ийэбитин олус күүскэ таптыыбыт. Ийэм кэрэ куоластаах буолан, эмдэй-сэмдэй сааспыттан ырыа алыбыгар уйдаран ырыаһыт буоллаҕым. Ийэм өттүнэн өбүгэлэрбэр олоҥхоһуттар, алгысчыттар, тойуксуттар бааллар. Онон киэн туттабын.
- Эн санааҕар кэрэ аҥаар Орто дойдуга айыллан кэлбит анала туохханый?
-Саха дьахтара сэмэй, холку, таайыллыбат таабырын буолуохтаах. Эр киһи ол таабырыны таайа сатаан, таптаан олорор диэххэ сөп. Ас амтаннааҕын остуол хотойорунан астыахтаах. Саха кыыһа алаас сибэккитин курдук сырдаан, сылаанньыйан, Орто дойдуну, тулалаан турар эйгэни киэргэтэр аналлаах. Ол эбэтэр, күн сылааһын ылан, тула өттүн арчылыыр аналлаах.
-Саха сирин дьахталларыгар тугу баҕараҕыный?
- Түгэнинэн туһанан, Сахам сирин сэмэй кыргыттарын, далбар хотуттарын, истиҥ эбэлэрин кэлэн иһэр Дьахталлар аан дойдутааҕы күннэринэн эҕэрдэлиибин! Кэрэ аҥаардарга талан ылбыт идэлэрин таптыылларыгар баҕарабын. Билиҥҥи үйэҕэ киһи идэтин ис сүрэҕиттэн сөбүлүүр эрэ буоллаҕына, үлэтэ-хамнаһа тахсыылаах. Онон, идэлээх буолуҥ, идэҕитин таптаан. Идэни сөпкө талыы эмиэ эмиэ туспа дьол ээ. Уонна саха дьахтарын аатын ааттата туруҥ! 
Бу курдук, Виталий Очиров кэрэ аҥаар туһунан санаатын үллэһиннэ. Кини бу кулун тутар 7 күнүгэр «Анаабыт курдук» айар киэһээтигэр долгуйа күүтэр.