“Саха ыччатын – промышленноска-14” экспедиция - Мирнэйгэ

Номнуо 14-с төгүлүн ыытыллар “Саха ыччатын – промышленноска” бырайыак оҕолоро кулун тутар 24 күнүгэр Кыһыл Сыыр-Мирнэй-Ленскэй-Таалакаан хайысханан айаҥҥа туруммуттара.


Оҕолору атаара промышленность миниистирэ Андрей Панов, ыччат миниистирин бастакы солбуйааччы Гавриил Семенов, “Я-Инженер” коммерческайа суох партнерство салайааччыта Владимир Аммосов, “Сахатранснефтегаз” үлэһитэ Аян Уваров уо.д.а. кэлбиттэрэ.


Экспедициябытыгар сүүмэрдээбит оҕолорбут өрөспүүбүлүкэ араас муннуктарыттан кэлбиттэрэ. Бу оҕолортон үгүстэрэ Бүлүү улуустарынан сылдьа илик эбит.
Уолаттар-кыргыттар бэйэ-бэйэлэрин кытта бодоруһан барыылара ыстаарастаны таллыбыт. Ыстаарастанан Дьокуускай 17-с №-дээх оскуолатын 10-c кылааһын үөрэнээччитэ Аял Герасимов буолла.
Саха сирин тоҕус улууһун гааһынан хааччыйан олорор аатырар-сураҕырар Кыһыл Сыыр дэриэбинэ уоттара номнуо хараҥарыыта биһиги иннибитигэр сандаарыс гыннылар. Биһигини “ЯТЭК” тэрилтэ пресс-сулууспатын үлэһитэ Петр Кузнецов көрүстэ. Хонук сирбитин, гостиницабытын булларда.

Кыһыл Сыырга этэҥҥэ хонон баран салгыы Сунтаар улууһугар диэри айаннаатыбыт. Автобус иһигэр олох күөстүү оргуйар. Ким ыллыыр, ким ырыа истэр, ким хаартылыыр. Айаннаан иһэн ырыа куонкуруһун тэрийдибит. Улуус кыраныыссатыгар кэллэхпитинэ, сахалыы сиэринэн сири-уоту аһатабыт, былаахпытын күөрэппитинэн хаартыскаҕа түһэн, видеоҕа уһуллабыт. “Саха ыччатын – промышленноска” оҕолоругар сахалыы үгэстэри тутуһуннарабыт, билбэттэрин кэпсиибит. Сылаалаах айаны дьоммут билбэккэ даҕаны хаалаллар.
Үһүс күммүтүгэр Мирнэйгэ “АЛРОСА” алмааһы наардыыр сыаҕар, 3-c № ылҕыыр фабрикабытыгар сырыттыбыт. Киэһэлик оройуон дьаһалтатын кытта көрүстүбүт.

Баһылыгы социальнай боппуруоска солбуйааччы Дмитрий Синявскай, ыччат кэмитиэтин бэрэссэдээтэлэ Алексей Болотин, бэрэссэдээтэли солбуйааччы Леонид Жалсараев уонна Мирнэйдээҕи техническэй колледж дириэктэрин солбуйааччы Наталья Березовая оҕолору кытта көрүстүлэр.
Бастаан Мирнэй оройуонун туһунан киинэ көрдөрдүлэр. Ол кэннэ Наталья Березовая колледжын туһунан кэпсээтэ. Бу колледжы бүтэрбит оҕо “АЛРОСА” курдук улахан тэрилтэҕэ быһалыы үлэлии киирэрин кэпсээн оҕолор интэриэстэрин тарта. Бэлиэтээн эттэххэ, билигин бу колледжка биһиги экспедициябытыгар кыттыбыт хас да оҕобут ситиһиилээхтик үөрэнэ сылдьар. Онон Наталья Березовая оҕолору МРТК-ҕа үөрэнэ кэлэллэригэр ыҥырда. Көрсүһүү түмүгэр Дмитрий Синявскай Мирнэй оройуонун туһунан улахан кинигэлэри “СЫП” кыттааччыларыгар барыларыгар бэлэх уунна.