Кулун тутар 27 күнүгэр Хонуу бөһүөлэгин Кыайыы болуоссатыгар тымныы күүстээх тыалтан чаҕыйбакка үгүс киһи муһунна. Манна "Индигир Кубога" Спартакиада 11-с төгүлүн үөрүүлээх аһыллыыта буолла.

Болуоссакка күрэхтэһии судьуйалара, кинилэр кэннилэриттэн Абый (баһылык М.Г. Никулин), Аллайыаха (баһылык Э.И. Слепцов), Өймөкөөн (баһылык М.М. Захаров), Усуйаана (депутаттар оройуоннааҕы Сэбиэттэрин председателэ А.Н. Болтунов), Муома (баһылык П.Н. Черемкин) оройуоннар хамаандалара сэлэлии хааман киирэллэр.

Хотугу сир маанылаах кыыла - таба көлөлөөх табаһыттар "Индигир кубога" факелын илдьэ кэлэллэр. Көҥүл тустууга ветераннарга аан дойду чемпиона Семен Соркомов күрэхтэһии уотун уматар. Ол кэнниттэн Саха Республикатын культуратын туйгуна, Хонуу бөһүөлэгин бочуоттаах олохтооҕо Ирина Слепцова арыалдьыт оҕолору кытта киирэн алгыс тыл этэр, хотугу сир хоһууттарыгар күрэхтэһиигэ ситиһиини баҕарар. Оскуола үөрэнээччилэрэ спортивнай үҥкүүнү көрдөрөллөр.

Спортивнай судьуйалар, спортсменнар ааттарыттан күрэхтэһии чиэһинэйдик барарыгар андаҕар тыллар этиллэллэр. СР спордун министрин солбуйааччы В.В. Агафонов спортсменнары эҕэрдэлиир. Кинини кытта бу күрэхтэһиигэ Дьокуускайтан спорт министерствотын специалистара кэлбиттэр. Муома оройуонун баһылыга П.Н. Черемкин күрэхтэһиини үөрүүлээх быһыы-майгы ортотугар аһар. Аллайыаха, Абый, Муома, Өймөкөөн, Усуйаана хамаандаларын капитаннара олохторун сэрии хонуутугар толук уурбут буойуттар обелискаларыгар гирлянда уураллар. Республика үтүөлээх артыыһа, саха эстрадатын биллиилээх ырыаһыта Аскалон Павлов спортсменнарга ситиһиини баҕаран туран бэйэтин ырыатын бэлэхтиир.

Быйылгы Спартакиада Россия бочуоттаах тутааччыта, СР норуотун хаһаайыстыбатын үтүөлээх үлэһитэ, Абый, Нерюнгри улуустарын бочуоттаах олохтооҕо, экономическай наука кандидата Виктор Петрович Ефимов сырдык кэриэһигэр ананна. Муомаҕа кини огдообото Любовь Николаевна уонна кинилэр кыыстара Любовь Викторовна кэлэн дьоһун ыалдьыт буоллулар.

Спратакиадаҕа спортсменнар биэс көрүҥҥэ: волейболга, хапсаҕайга, мас тардыһыытыгар, остуол тенниһигэр уонна атах оонньуутугар күрэстэһэллэр. Күрэхтэһии бүгүн, кулун тутар 30 күнүгэр, түмүктэнэр.