Ол курдук, бэс ыйын 1 күнүттэн Дьокуускай-Охотскай -Дьокуускай маршрут аһыллыаҕа. Охотскай бөһүөлэгэ Хабаровскай кыраайга баар, Охотскай муора аттыгар турар. Охотскай муораҕа 123 балык көрүҥэ баар. Туристар дуоһуйа балыктыахтарын, сынньаныахтарын сөп. Бу рейс нэдиэлэҕэ үстэ оҥоһуллуоҕа, Ан-24 сөмөлүөт көтүөҕэ. Биир өттүгэр көтүүгэ чэпчэтиилээх билиэт сыаната 7 665 солк.

Итини тэҥэ, бэс ыйын 3 күнүттэн алтынньы 21 күнүгэр диэри Улан-Удэ-Сеул-Улан-Удэ маршрут аһыллыаҕа. Билэрбит курдук, Сеул - Соҕуруу Корея киин куората.

Салгыы сайыҥҥы кэмҥэ сылын аайы аһыллар рейстэри сэргэ, быйыл ханнык саҥа маршруттар аһыллалларын уонна субсидиялаах бырагыраамалар тустарынан кэпсээтилэр. Олортон сүрүннэрин билиһиннэрдэххэ, кулун тутар 29 күнүттэн алтынньы 24 күнүгэр диэри Дьокуускайтан 60-тан тахса рейс Россия иһигэр уонна тас дойдуларга сайыҥҥы расписаниенан оҥоһуллуоҕа. Сайыҥҥы кэмҥэ рейс улахан аҥара киин куораттан көтүөҕэ.

Bombardier Q400 сөмөлүөт сайыҥҥы кэмҥэ Дьокуускайтан Нерюнгрига, Хабаровскайга, Благовещенскга, Улан-Удэҕэ көтүөҕэ.

Санкт-Петербурга оптуорунньукка эбии рейс киирдэ. Дьокуускайтан 14 чаас 30 мүнүүтэҕэ Boeing 737-800 лайнер көтүөҕэ.

Бэс ыйын 1 күнүттэн Дьокуускай-Чита-Дьокуускай, от ыйын 11 күнүттэн Дьокуускай-Петропавловск-Камчатка рейстэр аһыллыахтара.

Оттон Москва-Дьокуускай-Москва рейсинэн сөмөлүөт күн аайы көтөр буолла. Москва-Нерюнгри-Москва рейсэ бэс ыйын 2 күнүттэн нэдиэлэҕэ үстэ оҥоһуллуоҕа. Ыам ыйын ортотуттан Москва-Тиксии-Москва маршрут аһыллан, икки нэдиэлэҕэ биирдэ (чэппиэргэ) Boeing737-700, -800 лайнердар көтүөхтэрэ.

Бэс ыйын 1 күнүттэн «Якутия» авиахампаанньа Москва-Сочи-Москва маршрутунан нэдиэлэҕэ биэстэ көтүөҕэ, оттон бэс ыйын 15 күнүттэн - күн аайы. Рейстэр, билиэти атыылаһыыны туһунан 8-800-100-75-77 нүөмэргэ эрийэн сиһилии билсиҥ.

Маны тэҥэ суруналыыстарга хампаанньа көтөр ааллар пааркаларын саҥардыахтааҕын уонна өрөспүүбүлүкэҕэ бетона суох буор балаһалаах авиапортарга Bombardier Dash 8 Q300 сөмөлүөт түһэригэр көҥүл ылыллыахтааҕын, «Yakutia aero” сайт дизайна саҥардыллыбытын туһунан иһитиннэрдилэр.