- Регионнааҕы спортивнай киини тутуу туһунан кэпсэтии өссө икки сыллааҕыта барбыта. Онон Чурапчыга спортивнай бэлэмнээһин киинэ аһыллыахтааҕа эрдэттэн биллэрэ. Манна даҕатан эттэххэ, эһиилгиттэн спорка саҥа федеральнай программа оҥоһуллуохтаах. Уһук Илиҥҥи региоҥҥа үс регионнааҕы спортивнай киини аһар туһунан Россия бырабыыталыстыбатын уурааҕа тахсыбыта. Хабаровскайга, Владивостокка олор номнуо бааллар. Оттон биһиэхэ быйылгыттан Чурапчытааҕы федеральнай спортивнай институт базатыгар регионнааҕы спортивнай киин үлэлиэхтээх. Институкка 2007 сылтан спортивнай маастарыстыба үрдүкү оскуолатын филиала аһыллыбыта. Бу 13 үлэһиттээх филиал аата уларыйан регионнааҕы спортивнай киин диэн буолуоҕа. Муус устарга Егор Борисов спорт миниистирэ Виталий Муткону кытта сөбүлэҥ түһэрсэн турар.

Кэнники сылларга спорка көрдөрүүбүт куһаҕана суох. Өскөтүн 2005 с. улахан таһымҥа 11 эрэ чемпионнаах уонна призердаах буоллахпытына, 2015 с. номнуо 60-тан тахса чемпионнанныбыт, призерданныбыт. Мин санаабар, бу куһаҕана суох көрдөрүү.

Манна эбэн эттэххэ, 2013 с. Виталий Мутко Саха сиригэр кэлэ сылдьан Чурапчыга тахсан Д.П.Коркин аатынан өрөспүүбүлүкэтээҕи спортивнай оскуола-интернаты, федеральнай спортивнай институту көрөн-истэн, устудьуоннары, учууталлары, преподавателлэри кытта кэпсэтэн барбыта. Кини ол сырыытыгар тыа сиригэр спорка сыһыаннаах маннык үөрэх систиэмэтэ тэриллибитин өссө көрө иликпин диэбитэ. Онон регионнааҕы спортивнай киин Чурапчыга институт базатыгар олохтоноро сөптөөх.

Үрдүкү спортивнай маастарыстыба оскуолата бу мантан туох да оҕустарыыны ылбат. Сайдыы барыахтаах дии саныыбын. Саҥа туох эрэ саҕалааһын буолла да, хайаатар да утарсыылаах буолар. Санаан көрүҥ, 2003 с. спорт Үрдүкү спортивнай маастарыстыба оскуолата управлениеттан арахсарыгар эмиэ улахан айдаан тахса сылдьыбыта.

Үбүлээһин чааһын эттэххэ, саҥа бырайыагынан 45 мөл. солк. үс сылга тыырыллыаҕа. Быйыл үп көрүллүбэт. Онтон кэлэр үс сылга сыллата 15-тии мөл. солк. көрүллүөҕэ. Бу харчы үрдүкү спортивнай маастарыстыба оскуолатыттан ылыллыбат. Эһиил спорт программатыттан манна үбүлээһин көрүллэрин туруорсабыт. Маны таһынан федеральнай бюджеттан тутууга 800 мөл. солк. көрүллэрэ былааннанар. 2016 с. уопсай дьиэ уонна Киин тутуута саҕаланыаҕа. Маны сэргэ Чурапчыга тутуллубут “Боотур Уус” стадион эһиилгиттэн федеральнай бюджеттан үбүлэниэҕэ.