ДЮСШ тренердэрэ Василий Шадрин остуол тенниһигэр, Дмитрий Макаров национальнай ыстаныыларга, Валерий Скрябин көҥүл тустууга маастар-кылаастары ыыттылар. Манна ДЮСШ иитиллээччилэрэ - теннискэ республика призердара Марселена Захарова, Витя Пудов, национальнай ыстаныыларга спорт маастардара, республика чемпионнара Ньургуйаана Смирникова, Сардана Борисова, көҥүл тустууга республика призердара Витя Пудов, Артур Чычахов, о. д. а. кыттыыны ыллылар.

Бу бэлиэ даатанан ДЮСШ салалтата үлэлээбит уонна билигин үлэлии сылдьар тренердэргэ „Оҕо спордуттан - үрдүк ситиһиилэргэ“ диэн кинигэни, анал үрүҥ көмүс бэлиэлэри үөрүүлээх быһыыга-майгыга туттарда. Оскуолаҕа үлэлээбит сылларын туһунан ахтыылары тренердэр С.Н. Башарина, С.Д. Васильев, Г.М. Кривошапкин, П.Ф. Митин, К.М. Тимофеев, В.Н. Кривошапкин, И.П. Флегонтов оҥордулар.

ДЮСШ дириэктэрэ С.С. Морфунов бэлиэ даатанан эҕэрдэлээн туран, салайар коллективын 15 сыллаах үлэтин-хамнаһын билиһиннэрдэ. Ситиһиилэр кырата суохтар, үчүгэйдэр. Бу кэм устата бу оскуолаҕа дьарыктаммыт оҕолор улуус, республика сүүмэрдэммит хамаандатыгар киирэннэр, араас таһымнаах күрэхтэһиилэргэ кытыннылар. 5 Россия спордун маастара, 9 маастарга кандидат, 9 Саха Республикатын спордун маастара, 19 маастарга кандидат, 1 аан дойду призера, 10 Россия чемпиона, 9 призера, 126 республика чемпиона, 301 призер, 251 республикатааҕы турнирдар кыайыылаахтара, 301 призер иитиллэн таҕыстылар. Барыта 9 көрүҥҥэ—көҥүл тустууга, волейболга, остуол тенниһигэр, ытыыга, хотугу многоборьеҕа, национальнай ыстаныыларга, мас тардыһыытыгар, боксаҕа, хайыһарга дьарыктыыллар. Бу кэм устата барыта 8 666 оҕо дьарыктаммыт. Дириэктэр бу ситиһиилэргэ тренердэр оруоллара улаханын бэлиэтээн туран, кинилэргэ махтанна.

Улуус Мунньаҕын председателэ Я.П. Оконешников эҕэрдэ тыл эттэ, „Чурапчы улууһун социальнай-экономическай сайдыытыгар киллэрбит кылаатын иһин“ 3-с степеннээх анал бэлиэни В.С. Дьяконовка, К.М. Тимофеевка, улуус баһылыгын, улуус Мунньаҕын грамотатын, анал үрүҥ көмүс бэлиэни Н.Ф. Смирниковка, улуус баһылыгын Бочуотунай грамотатын Г.И. Кривошапкиҥҥа, В. Шадриҥҥа, Махтал суругу П.В. Егороваҕа туттартаата. СР Үөрэҕин министиэристибэтиттэн бэрэстэбиитэллэр И.Р. Постникова, К.Д. Тарабукин эҕэрдэ тылы эттилэр, „РФ уопсай үөрэхтээһинин бочуоттаах үлэһитэ“ дастабырыанньаны, бэлиэни С.П. Макаровка, „Саха Республикатын үөрэҕириитин туйгуна“ дастабырыанньаны, бэлиэни Е.С. Капитоновка, министиэристибэ Бочуотунай грамотатын П.Д. Собакиҥҥа, Н.К. Сивцевкэ, В.М. Скрябиҥҥэ туттардылар. Үөрэх управлениетын үлэһитэ И.Г. Винокурова, Чурапчы улууһун спортка управлениетын начальнига В.И. Давыдов, Одьулуун нэһилиэгин баһылыга Л.В. Ефремова, ДЮСШ бастакы дириэктэринэн үлэлээбит В.С. Дьяконов, оскуола дириэктэрдэрэ эҕэрдэлээтилэр, бэлэхтэрин туттардылар.

Үөрүүлээх бырааһынньыгы талба талааннаахтар эҕэрдэ нүөмэрдэринэн киэргэттилэр.