Уһуйаан үлэһиттэрэ оҕону иитиигэ үгүс үлэни былааннаахтык ыыталлар. Өрөспүүбүлүкэҕэ, дойдуга ыытыллар куонкурустарга, тэрээһиннэргэ ситиһиилээхтик кытталлар. Уһуйааҥҥа төрөппүттэри кытта ыкса сибээстээхтик үлэлииллэрэ хайҕаллаах. Ол курдук, "Эвинек", Саҥа дьыл, Улуу Кыайыы 70 сылыгар анаммыт уо.д.а. тэрээһиннэр киэҥ далааһыннаахтык, үрдүк таһымҥа ыытылыннылар.

Национальнай оройуон буоларбыт быһыытынан, уһуйааҥҥа төрөөбүт тылы, төрүт үгэстэри, фольклору, национальнай култуураны, эбээн тылын үөрэтиигэ улахан болҕомто ууруллар. Манна методист Харчаана Викторовна Горохова үгүс сырата көстөр. Сэбиэдиссэй Любовь Ивановна Стручкова, ыстаарсай иитээччи Марина Васильевна Верховская сатабыллаах салайыыларынан уһуйаан ханнык баҕарар тэрээһиннэргэ, көрүүлэргэ куруутун инники күөҥҥэ сылдьар. Бу күннэргэ Марина Верховская "Социализация растущего человека в контексте прогрессивных научных идей 21 века: социальное развитие детей дошкольного возраста" диэн маҥнайгы Бүтүн Арассыыйатааҕы научнай - практическай коференцияҕа кыттыбытын туоһулуур сертификат тутан, кэлэктиип үөрүүтэ үгүс.

Санатан эттэххэ, быйыл аан дойдутааҕы баан үбүлээһининэн улуус киинигэр 75 миэстэлээх таас уһуйаан тутуута былааннаммыта. Ол эрэн, биллэр экэнэмиичэскэй балаһыанньаннан тохтотуллубута. Ханна да буоларын курдук, уһуйааҥҥа миэстэ суоҕунан, үгүс оҕо хабыллыбат. Ол курдук, бу балаҕан ыйыгар 3 сааһын туолар 50 оҕо баар. Мантан 37 оҕо "Хаарчаана" уһуйааҥҥа киириэҕэ. Онтон ахсынньы ыйга 3 сааһын туолар 62 оҕо баар.Оччотугар уһуйаанынан кыайан хабыллыбатах оҕо ахсаана элбээн тахсар. Билигин электроннай уочаракка 106 оҕо баар. Ол иһигэр 3-7 диэри саастаах 24 оҕо. Онон, саҥа уһуйаан тутулуннаҕына эрэ 3 саастарыттан үөһээ оҕолор толору хабыллар кыахтаналлар.

Үөрэх министиэристибэтэ балаҕан, алтынньы ыйдарга куонкурус биллэрэн, ол түмүгүнэн кыһыҥҥы суолунан тутуу матырыйаала тиэллэн кэлэрэ сабаҕаланар. Оччотугар 2016 сылга улуус киинигэр саҥа оҕо уһуйаана аанын арыйыа диэн эрэл баар. Маны таһынан, 2016 сылга саҥа оскуола, киин хочуолунай тутуута саҕаланара былааннанар.